Një blackout masiv elektrik ka goditur sot Spanjën dhe Portugalinë, duke shkaktuar ndërprerje të transportit publik, si avionët, trenat dhe metrotë, si dhe probleme serioze në komunikime, me pasoja të mëdha për popullsinë.
Energjia elektrike është ndërprerë papritur rreth orës 12:30 në disa zona të Gadishullit Iberik, për t’u përhapur më pas në rajone gjithnjë e më të gjera. Raportime për ndërprerje të energjisë kanë ardhur nga qytete si Madrid, Murcia, Galicia, Alicante, Zaragoza, Ávila, Segovia, si dhe nga disa qytete të Portugalisë.
Si pasojë e ndërprerjes së energjisë, janë bllokuar aeroportet dhe rrjetet hekurudhore, përfshirë edhe linjat e trenave me shpejtësi të lartë. Në errësirë kanë mbetur gjithashtu fabrikat dhe qendrat tregtare. Raportime të shumta tregojnë se semaforët kanë dalë jashtë funksioni, duke shkaktuar vështirësi në qarkullim dhe disa aksidente të pashmangshme.
Red Eléctrica de España, operatori i infrastrukturës elektrike në Spanjë, ka aktivizuar planet e emergjencës për rikthimin e furnizimit me energji elektrike në bashkëpunim me kompanitë e sektorit. Autoritetet njoftuan se shkaqet e blackout-it janë ende në proces analize dhe të gjitha burimet janë vënë në dispozicion për zgjidhjen e problemit.
Ndërkohë, Instituti Kombëtar për Sigurinë Kibernetike (INCIBE) po heton për të përcaktuar nëse blackout-i mund të jetë shkaktuar nga një sulm kibernetik.
Në Madrid, sipas dëshmive të banorëve në rrjetet sociale, e gjithë rrjeti i metrosë është evakuuar për shkak të ndërprerjes së energjisë. Shërbimet e internetit dhe telefonisë mobile të disa kompanive kanë pësuar gjithashtu ndërprerje duke nisur nga ora 12:30.
Përballë situatës, qeveria spanjolle ka thirrur një mbledhje emergjente në Moncloa. Autoritetet kanë bërë thirrje për ndalim të përkohshëm të lëvizjes me automjete, duke këshilluar qytetarët të mos drejtojnë mjetet derisa të rikthehet furnizimi me energji, pasi semaforët dhe kamerat e kontrollit të trafikut janë jashtë funksionit./skyweb.al
