Shqipëria po motorizohet me ritme të shpejta dhe statistikat më të fundit të INSTAT për tremujorin e tretë 2025 e konfirmojnë qartë këtë tendencë. Në total, në territorin e vendit qarkullojnë 1.025.981 mjete rrugore, një rritje prej 9.2%krahasuar me të njëjtën periudhë të vitit 2024. Edhe regjistrimet e reja kanë shënuar rritje, megjithëse më e moderuar, me 1.6%.
Raporti i motorizimit arrin në 434 mjete për 1000 banorë, një tregues që është rritur dukshëm vitet e fundit. Autoveturat vijojnë të dominojnë qarkullimin, duke përbërë 80.8% të të gjitha mjeteve, të ndjekura nga motorët me 6% dhe automjetet për transport të përzier me 5.9%.
Tirana mban peshën kryesore me 34.7% të mjeteve në qarkullim, e ndjekur nga Durrësi me 13.6%. Në skajin tjetër, Gjirokastra dhe Kukësi mbeten qarqet me më pak mjete, me përkatësisht 2.2% dhe 2.4%.
Gjatë tremujorit të tretë u regjistruan për herë të parë 26.614 mjete, ku 82.3% ishin autovetura. Edhe këtu Tirana kryeson me 39.5% të regjistrimeve të reja.
Por dinamika më e dukshme e këtij tremujori është ajo e fronit të markave. Tek mjetet e regjistruara rishtazi, Volkswagen ka kaluar në vend të parë me 19.8%, duke lënë pas Mercedes-Benz, që zbriti në 17%. /skyweb.al
