Shqipëria renditet e para në Europë për mbipopullimin e banesave, sipas të dhënave të fundit të Eurostat për vitin 2024. Më shumë se gjysma e popullsisë (57%) jeton në shtëpi të mbingarkuara me njerëz, një përqindje që nuk e arrin asnjë nga 35 vendet e analizuara.
Kjo situatë vjen në një kohë kur në vend raportohen dhjetëra mijëra apartamente të pashitura apo të pabanuara, duke theksuar kontrastin e thellë mes ofertës dhe mundësive reale të qytetarëve.
Të dhënat tregojnë se ndërsa mesatarja e BE-së është 16.9%, Shqipëria qëndron shumë më lart se vendet që prej vitesh njihen për probleme të strehimit.
Rumania ka një normë mbipopullimi prej 40.7%, Serbia 46.6% dhe Turqia 38.2%, por të gjitha këto shtete mbeten nën nivelin shqiptar. Bullgaria, Kroacia dhe Polonia lëvizin në intervalin 31-34%, duke dëshmuar se edhe vende me të ardhura mesatare kanë arritur ta frenojnë këtë fenomen.
Në anën tjetër qëndrojnë vendet me cilësinë më të mirë të banesave: Qipro me vetëm 2.4% mbipopullim, Malta me 4.4%, Holanda me 4.6%, si edhe Norvegjia, Irlanda dhe Zvicra, të cilat raportojnë nivele minimale falë politikave të qëndrueshme të strehimit dhe standardeve të larta të mirëqenies.
Panorama bëhet edhe më e qartë me të dhënat e Censit, që tregojnë se familjet shqiptare me shumë anëtarë janë më të prekura nga mungesa e hapësirës së mjaftueshme. Nga 726 mijë banesat e banuara në vend, një numër i konsiderueshëm i familjeve me 4 dhe sidomos 5 ose më shumë persona jetojnë në ambiente shumë të vogla. Mbi 67 mijë familje me 5+ anëtarë banojnë në hapësira prej vetëm 40–69 m², ndërsa afro 40 mijë të tjera në shtëpi 70–99 m², të cilat janë larg standardeve minimale për një familje të madhe. /skyweb.al
