Enti Rregullator i Ujit ka refuzuar kërkesën e Shoqërisë Rajonale Ujësjellës Kanalizime Kukës për një rritje të re të tarifave të ujit, duke nënvizuar se kompania nuk dorëzoi dokumentet e detyrueshme që mbështesin kërkesën e saj tarifore.
Vendimi i datës 13 tetor 2025 mbyll procedurën pa miratim, jo për shkak të vlerësimit negativ të tarifës, por për mungesë të plotë dokumentacioni, raporton Skyweb.al.
Kjo është hera e dytë që ndërmarrja e Kukësit tenton të kërkojë shtrenjtim të ujit. Në vitin 2022 ERRU kishte miratuar një rritje të ndjeshme: Çmimi për abonentët familjarë u rrit nga 25 në 30 lekë/m³, në një kohë kur qytetarët furnizoheshin vetëm 3 deri në 5 orë ujë në ditë.
Vendimi i atëhershëm u shoqërua me reagime të forta nga banorët, sidomos duke pasur parasysh nivelin e lartë të varfërisë në qark dhe numrin e madh të familjeve që trajtohen me ndihmë ekonomike.
Në vitin 2024 Ujësjellësi Kukës paraqiti një kërkesë të re për rritje tarife, por këtë herë ERRU e refuzoi pa hyrë në analizën e thelbit, pasi kompania nuk dorëzoi pasqyrat financiare të certifikuara, planin 5-vjeçar të biznesit, vendimin e Këshillit të Administrimit, mendimin e pushtetit vendor dhe procesverbalet e dëgjesave publike.
Pa këtë dokumentacion, ERRU theksoi se nuk mund të vlerësonte nëse rritja e kërkuar ishte e justifikuar.
Me këtë vendim, tarifat në Kukës mbeten të pandryshuara. Ndërmarrja pritet të aplikojë sërish në vitin 2026, këtë herë me detyrimin për të dorëzuar një dosje të plotë dhe të argumentuar financiarisht.
Refuzimi aktual vjen ndërkohë që furnizimi me ujë në Kukës vijon të jetë i kufizuar dhe projekti për optimizimin e rrjetit ende nuk është përfunduar, duke shtuar presionin mbi një komunitet që tashmë përballet me kosto të larta jetese dhe shërbim të pamjaftueshëm. /skyweb.al
