Dhuratat zyrtare të marra nga kryeministrja italiane Giorgia Meloni do të dalin në ankand, dhe të ardhurat nga shitja e tyre do t’u jepen organizatave dhe shoqatave jofitimprurëse.
Mes tyre përfshihen një set bizhuterish të dhuruara nga Libia, një palë këpucë pitoni blu me taka të arta, si edhe një tablet i ofruar nga presidenti ukrainas Volodymyr Zelensky. Gjatë tre viteve të fundit, Meloni ka marrë qindra dhurata gjatë vizitave zyrtare në mbarë botën, aktualisht lista arrin në 270 artikuj.
Sipas ligjit italian, dhuratat me vlerë mbi 300 euro nuk mund të mbahen personalisht dhe ato më të vlefshmet ruhen në një kasafortë shtetërore. Në fund të tetorit, sekretari i përgjithshëm i Palazzo Chigi urdhëroi që këto objekte të shiten, dhe së fundmi një rezolutë i ka besuar kompanisë “Bertolami Fine Art” administrimin e ankandit.
Lista përfundimtare e dhuratave që do të shiten ende nuk është bërë publike. Shtëpia romake e ankandeve dhe galeria e artit do të vlerësojnë secilin objekt, pasi kanë fituar kontratën me vlerë 40 000 euro, duke ofruar gjithashtu një shpërblim prej 5% të të ardhurave nga shitja. /skyweb.al
