Gjatë dy javëve të fundit, veprimet hetimore të SPAK kanë goditur një sërë institucionesh kyçe të administratës publike, duke krijuar bllokime të dukshme në funksionimin e tyre.
Më 20 nëntor, GJKKO pezulloi nga detyra ministren e Infrastrukturës dhe Energjetikës, Belinda Balluku, në kuadër të hetimeve për procedurat e prokurimit të tunelit të Llogarasë.
Dy javë më pas, me urdhër të SPAK, u caktuan masa sigurie “arrest në shtëpi” për dy drejtues të rëndësishëm: drejtorin e ARRSH, Gentian Gjyli, dhe drejtorin e KESH, Erald Elezi.
Pezullimi i ministres ka bërë të pamundur firmosjen e zëvendësimeve në KESH, duke krijuar boshllëqe në drejtimin e sektorit të energjisë dhe projekteve infrastrukturore.
Goditja më e fortë erdhi në AKSHI, ku SPAK ka shpallur të gjithë kupolën drejtuese pjesë të një grupi të strukturuar kriminal.
Mirlinda Karçanaj u vu në “arrest shtëpie”, ndërsa ndaj Ergys Agasit dhe Ermal Beqirit u caktua masa “arrest me burg”. Së bashku me ta janë hetuar edhe disa biznesmenë dhe zyrtarë të tjerë të lidhur me procedurat e tenderimit.
Burime nga administrata bëjnë me dije se pas këtyre zhvillimeve, disa institucione po përballen me vështirësi në funksionimin e përditshëm.
Në disa raste, drejtues të njësive nuk po firmosin për blerje materiale bazike si kompjuterë, karrige apo furnizime zyrash, nga frika për t’u përfshirë në procedura të cilat mund të jenë objekt hetimi.
Si pasojë, gjatë vitit 2025 rezulton se një pjesë e institucioneve ka teprica të konsiderueshme në buxhet, pasi tenderët dhe shpenzimet janë frenuar.
Frika i ka kapluar të gjithë në këtë prag festash, ndërkohë që në orët apo ditët flitet për një arrestim tjetër VIP të SPAK…/skyweb.al
