Një episod i rëndë i dokumentuar në dosjen hetimore të SPAK zbardh mënyrën se si Gerond Meçe, pronari i kompanisë Advanced Bussines Solutions (ABS( është marrë peng dhe nën dhunë është detyruar të tërheqë ankimimet e depozituara pranë AKSHI dhe Komisioni i Prokurimit Publik.
Sipas dosjes që ka parë Skyweb.al, persona të paidentifikuar kanë ushtruar dhunë fizike dhe kanosje me armë ndaj Gerond Meçes, duke e detyruar, kundër vullnetit të tij, të hipë në automjetin e tyre. Në këtë mënyrë, atij i është hequr liria në mënyrë të paligjshme sipas SPAK.
Pas rrëmbimit, personat që e mbanin peng e kanë detyruar Meçen të dorëzojë telefonin celular. Nga ky aparat, ata kanë komunikuar me administratorin e shoqërisë, Shkëlqim Kërluku, duke u paraqitur sikur mesazhet dhe kërkesat po dërgoheshin nga vetë Gerond Meçe.
Në këtë kontekst, SPAK evidenton edhe rolin e Erjon Ismailit, me detyrë zëvendësdrejtor i Drejtorisë Vendore të Policisë Tiranë në kohën e ngjarjes. Sipas deklarimeve të Gerond Meçes, Erjon Ismaili i ka kërkuar atij “të rrijë larg AKSHI-t”, një kërkesë që, sipas prokurorëve, përputhet me rezultatin e pamjeve filmike të sekuestruara në zyrën e Ergys Agasit. Në këto pamje, sipas dosjes, evidentohen disa takime mes Ergys Agasit dhe Erjon Ismailit, duke ngritur dyshime për lidhje shoqërore dhe interesa të përbashkëta.
SPAK thekson se ky episod është në përputhje me “modus operandi”-n e konstatuar në raste të tjera, ku përmes presioneve, kërcënimeve dhe ndërhyrjeve të paligjshme janë synuar të hiqen pengesat në procedurat e prokurimit publik. Hetuesit e lidhin rrëmbimin e Gerond Meçes edhe me raste të mëparshme, ku përmes ankimimeve pranë KPP janë bllokuar procedura tenderimi të zhvilluara nga AKSHI.
Në komunikimet e kryera, administratori është vënë nën presion (në dukje nga Meçe mqs pengmarrësit po flisnin me celularin e tij) për të vepruar menjëherë dhe për të tërhequr të gjitha ankimimet e paraqitura nga subjekti përkatës në institucionet përgjegjëse për prokurimet publike.
Në dosje theksohet se mesazhet dhe kërkesat ishin formuluar në mënyrë të tillë që të krijonin bindjen se vinin drejtpërdrejt nga Meçe, pa asnjë dyshim për ndërhyrje të jashtme.
Si pasojë e këtyre komunikimeve, administratori ka kryer veprime konkrete në platformën shtetërore, duke u tërhequr nga ankimimet e depozituara.
Hetimi vëren se tërheqja nuk është bërë vetëm për procedurat ku subjekti ishte ankimues, por edhe për procedura të tjera ku ai ishte pjesëmarrës, fakt që, sipas SPAK, ngre dyshime serioze për presion të organizuar dhe ndërhyrje të paligjshme në proceset e prokurimit.
Në dosje nënvizohet se mënyra e veprimit, koha e reagimit dhe shtrirja e tërheqjeve sugjerojnë një skemë të mirëmenduar për të neutralizuar ankimimet dhe për të eliminuar pengesat në procedura të caktuara tenderimi.
SPAK e konsideron këtë episod si një nga provat kyçe të pengimit të drejtësisë dhe ndërhyrjes kriminale në proceset administrative, duke e lidhur atë me hetimin e gjerë për skandalin e tenderave të AKSHI-t.
Hetimet vijojnë për identifikimin e personave të përfshirë në rrëmbimin, dhunën dhe përdorimin e telefonit të viktimës, si dhe për zbardhjen e plotë të rolit të secilit në këtë ngjarje. /skyweb.al
