SPAK dyshon se një skemë faturimesh fiktive është përdorur për të kanalizuar fondet e përfituara nga AKSHI, përmes kompanive të lidhura me Andis Papën dhe Ermal Beqirin, drejt subjekteve të tjera, duke i justifikuar transaksionet formalisht si blerje të produkteve ushqimore, sipas dosjes që ka konsultuar skyweb.al.
Në qendër të kësaj skeme, sipas akteve hetimore, janë shoqëritë “Soft & Solution” sh.p.k. dhe “Fastech” sh.p.k., të cilat për periudhën 2018–2021 rezultojnë se kanë blerë produkte nga subjekti “Mega Distribution” sh.p.k., i regjistruar me NIPT L02302016U. Ky subjekt aktualisht administrohet nga Bedri Rryta, ndërsa në periudhën e mëparshme ka qenë në pronësi të Rogers Rrytës, i pyetur nga hetuesit në cilësinë e personit që tregon rrethana të hetimit.
Nga deklarimet e dhëna në dosje rezulton se “Mega Distribution” ushtron aktivitet tregtar në fushën e produkteve ushqimore dhe veshjeve, duke shpërndarë çokollata, biskota, akullore dhe produkte të tjera të konsumit, si dhe veshje të shitura në dyqane me emrin “Rogers”. Subjekti nuk ka aktivitet dhe nuk ka ushtruar aktivitet në fushën e teknologjisë së informacionit.
Megjithatë, referuar akteve bankare, në llogaritë e “Mega Distribution” janë konstatuar kreditime të vazhdueshme gjatë viteve 2018, 2020 dhe 2021, në një shumë totale mbi 10 milionë euro, në disa llogari bankare dhe në monedha të ndryshme. Këto fonde janë deklaruar si pagesa për fatura shitjeje që lidhen me tregtimin e çokollatave dhe biskotave ndaj shoqërive “Soft & Solution” dhe “Fastech”.
Sipas SPAK, pikërisht këto transaksione ngrenë dyshime serioze, pasi shoqëritë “Soft & Solution” dhe “Fastech” operojnë në sektorin e teknologjisë së informacionit dhe rezulton e paqartë arsyeja ekonomike për blerje masive të produkteve ushqimore me vlera që kapin mbi 10 milionë euro. Hetimet dyshojnë se këto faturime janë përdorur si mekanizëm formal për qarkullimin dhe kanalizimin e fondeve publike të përfituara nga tenderët e AKSHI-t.
Në deklarimet e tij, administratori i “Mega Distribution” ka pohuar se fondet janë përdorur për vijimin e aktivitetit tregtar të shoqërisë, por ka deklaruar se nuk ka dijeni për aktivitetin tregtar të “Soft & Solution” dhe “Fastech”, si dhe se nuk njeh dhe nuk ka pasur marrëdhënie me Andis Papën, Ermal Beqirin, Ergys Agasin dhe Mirlinda Karçanajn. /skyweb.al
