Një inxhiniere nga Gjermania është bërë personi i parë në botë, me aftesi te kufizuar që përdor karrige me rrota dhe shkon në hapësirë, raporton BBC.
Michaela Benthaus, e cila pësoi një dëmtim të palcës kurrizore në një aksident me biçikletë malore shtatë vite më parë, kishte kontaktuar online një inxhinier të pensionuar të hapësirës për ta pyetur nëse ëndrra e saj për t’u bërë astronaute ishte ende e mundur.
Ai më pas ndihmoi në organizimin e fluturimit historik 10-minutësh me Blue Origin, kompaninë e turizmit hapësinor të themeluar nga Jeff Bezos.
Znj. Benthaus dhe pesë persona të tjerë u nisën nga Teksasi të shtunën dhe arritën pak mbi të ashtuquajturin “kufi” të hapësirës, i njohur si vija Kármán. “Ishte përvoja më e jashtëzakonshme!” tha ajo pas uljes, në një video të publikuar nga Blue Origin.
“Nuk më pëlqeu vetëm pamja dhe mungesa e gravitetit, por edhe ngritja. Ishte shumë e bukur – çdo fazë e ngritjes.”
New Shepard, mjeti nën-orbital i ripërdorshëm i Blue Origin, u nis nga platforma e kompanisë në Teksas në orën 14:15 GMT.
Znj. Benthaus, e cila punon në Agjencinë Evropiane të Hapësirës, tha se pas aksidentit kishte kuptuar “vërtet, vërtet se sa i paarritshëm është ende bota jonë” për personat me aftësi të kufizuara.
Ajo hyri vetë nga karrigia e saj me rrota në kapsulë, duke përdorur një stol që shtrihej nga hyrja.
Hans Koenigsmann, ish-menaxher i SpaceX në pension, i cili ndihmoi në organizimin e udhëtimit, ishte ulur pranë saj për të ofruar ndihmë gjatë fluturimit nëse do të ishte e nevojshme.
“Herën e parë që e takova Hansin ishte online,” tha znj. Benthaus. “E pyeta thjesht: ti ke punuar për kaq gjatë për SpaceX, mendon se njerëz si unë mund të bëhen astronautë?”
Koenigsmann tha se znj. Benthaus “e frymëzoi thellësisht” për ta realizuar këtë nismë. “Është këmbëngulja e saj ajo që më bindi se duhej ta bënim këtë dhe të përjetonim diçka që unë e kisha parë vetëm nga jashtë për një kohë të gjatë,” u shpreh ai.
Blue Origin tha se kishte shtuar pajisje mbështetëse në tokë për ta ndihmuar znj. Benthaus të hynte dhe të dilte nga kapsula.
“Fluturimi i Michi-t është veçanërisht domethënës, sepse tregon se hapësira është për të gjithë, dhe ne jemi krenarë që e ndihmuam ta realizojë këtë ëndërr,” tha Phil Joyce, nënkryetar i lartë i programit New Shepard.
Kostoja e misionit, që ishte fluturimi i 16-të suborbital turistik i kryer nga Blue Origin, nuk është bërë publike.
Kompania ka dërguar dhjetëra turistë në hapësirë. Në prill, këngëtarja Katy Perry, e fejuara e Bezos-it Lauren Sánchez dhe prezantuesja e CBS Gayle King ishin mes gjashtë grave që u nisën drejt hapësirës me një raketë të Blue Origin, në një fluturim që zgjati rreth 11 minuta.
Këto fluturime shumë të komentuara vijnë në një kohë kur kompanitë private të hapësirës po konkurrojnë ashpër për dominim në turizmin hapësinor. /Skyweb.al
