Kryeministri Edi Rama ka ndarë në rrjetet sociale një postim lidhur me Maratonën e Sigurisë Kibernetike, duke e cilësuar këtë nismë si një hap të rëndësishëm për adresimin e sfidave reale me të cilat përballen fëmijët dhe të rinjtë në hapësirën digjitale.
Sipas Ramës, siguria kibernetike kërkon një bashkëpunim të vazhdueshëm mes shkollës, prindërve dhe institucioneve, me qëllim parandalimin e rreziqeve që vijnë nga përdorimi i pakontrolluar i teknologjisë dhe platformave online.
“Maratona e Sigurisë Kibernetike është një nismë e rëndësishme mbi sfidat reale të fëmijëve dhe të rinjve në hapësirën digjitale, ku shkolla, prindërit dhe institucionet duhet të jenë në koordinim të përhershëm për të parandaluar rreziqet”, shkruan Kryeministri në postimin e tij.
Ai thekson se kjo qasje përfshin një sërë masash konkrete, që nisin nga ndalimi i përdorimit të celularëve gjatë orës së mësimit dhe vijojnë me programet pas shkollore në art, zeje dhe sport, ngritjen e SmartLabs, zbatimin e kurrikulës së re të teknologjisë së informacionit dhe komunikimit, si dhe trajnime për mësuesit dhe udhëzues për prindërit.
Sipas Ramës, të gjitha këto elemente synojnë ndërtimin e një kulture online të shëndetshme dhe rritjen e nivelit të sigurisë digjitale për fëmijët dhe të rinjtë. /skyweb.al
