Croatia Airlines ka hequr nga përdorimi avionin e saj të dytë Dash 8 Q400 me 72 vende, në kuadër të tranzicionit drejt një flote të unifikuar me avionë Airbus A220.
Avioni i hequr nga operimi, i regjistruar me kodin 9A-CQA dhe emrin “Slavonija”, u kthye fundjavën e kaluar te kompania që ka pronësinë në Kanada, pas 17 vitesh shërbim.
Ky veprim vjen pas tërheqjes së një tjetër avioni Dash 8 më herët gjatë vitit (9A-CQB), dhe bën që kompania të operojë me katër avionë Dash 8 gjatë sezonit veror.
Të gjithë avionët “turbopropë” (me helika sh.r) janë në përdorim përmes qirasë operacionale dhe përbënin 57.8% të fluturimeve të planifikuara të Croatia Airlines në vitin 2024. Mosha mesatare e tyre është rreth 15 vjet.
Zgjerimi i flotës Airbus A220
Ndërkohë, Croatia Airlines po përgatitet për një zgjerim të mëtejshëm të flotës Airbus A220. Deri në vitin 2027, kompania do të marrë në dorëzim edhe njëmbëdhjetë A220-300 me kapacitet 149 ulëse, si dhe dy A220-100 me 127 ulëse, që do të bëhen avionët më të vegjël në flotë.
Avioni i tretë A220-300, i quajtur “Dubrovnik”, pritet të mbërrijë përpara sezonit të ngarkuar veror, ndërsa A220-100 i parë do të vijë në fund të tetorit, përpara fillimit të sezonit dimëror. Gjatë vitit 2025, pritet dorëzimi i pesë avionëve A220.
Sipas CEO Bajić, mbërritja e avionëve të rinj do të ndihmojë në rritjen e kapaciteteve të kompanisë, përmirësimin e konkurrueshmërisë dhe qëndrueshmërisë mjedisore, si dhe ofrimin e një eksperience më moderne për pasagjerët.
Kalimi në një flotë të unifikuar Airbus është një hap strategjik në transformimin afatgjatë të Croatia Airlines./skyweb.al
