Franca ka dislokuar avionë luftarakë “Rafale” në Emiratet e Bashkuara Arabe për të mbrojtur bazat e saj detare dhe ajrore nga kërcënimet iraniane, bëri të ditur ministri i Jashtëm francez, Jean-Noël Barrot.
Parisi mban qindra trupa të marinës, forcave ajrore dhe ushtrisë në Emiratet e Bashkuara Arabe, ndërsa avionët “Rafale” janë vendosur në bazën ajrore Al Dhafra Air Base, pranë Abu Dabit.
“Avionët ‘Rafale’ dhe pilotët e tyre janë mobilizuar për të garantuar sigurinë e objekteve tona”, deklaroi Barrot për BFMTV, duke iu përgjigjur pyetjeve mbi veprimet e Francës gjatë fundjavës për neutralizimin e dronëve iranianë.
Ai shtoi se forcat franceze kanë zhvilluar operacione për të siguruar hapësirën ajrore mbi bazat e tyre.
Ndërkohë, Shtetet e Bashkuara dhe Izraeli ndërmorën sulme ndaj Iranit, ndërsa Teherani reagoi duke paralajmëruar kundërpërgjigje ndaj aleatëve të SHBA-së në rajonin e Gjirit dhe duke kërcënuar me rritje të kostove të energjisë, çka mund të ketë pasoja të ndjeshme për ekonominë globale.
