Një skemë e dyshuar për pastrim parash që përfshin transferta prej miliona eurosh nga parajsa fiskale, kompani me aktivitet të dyshimtë dhe individë me histori të pazakonta punësimi është zbuluar nga Autoriteti i Inteligjencës Financiare (AIF). Sipas raportit zyrtar për vitin 2024, një kompani shqiptare është vënë në qendër të një hetimi për qarkullim fiktiv fondesh dhe lidhje me subjekte të përfshira në lojëra fati dhe aktivitete të dyshimta ndërkombëtare.
Kompani me një punonjës, por 10 milionë euro qarkullim
Skema nis në dhjetor 2020, kur shtetasi A themeloi shoqërinë X, me objekt “shërbime konsulence”. Vetëm disa ditë më vonë, ai ia shiti kuotat një shtetasi të huaj, B, por mbeti administrator i kompanisë. Megjithatë, A vazhdoi të jetë punonjësi i vetëm i shoqërisë gjatë gjithë periudhës së analizuar, edhe pse, siç zbulohet në raport, ai ishte njëkohësisht i punësuar si kuzhinier në një restorant në Tiranë.
Gjatë viteve 2021-2022, shoqëria X përfitoi mbi 10 milionë euro nga transfertat ndërkombëtare të ardhura kryesisht nga Ishujt Cayman, Panama, Gjibraltar, Qipro, Maltë dhe Poloni – shtete që shpesh përmenden si parajsa fiskale. Transfertat, me përshkrimin “pagesë për shërbime”, ishin të urdhëruara nga kompani të përfshira në industrinë e lojërave të fatit.
Paratë përfunduan në Amerikën Latine dhe në dorë të një të tretë
Sipas raportit të AIF, rreth 80% e këtyre fondeve u transferuan më pas në favor të një kompanie tjetër, Z, e regjistruar në Amerikën Latine, përmes pagesash të faturave. Pjesa tjetër u përdor për të shlyer detyrime ndaj të tretëve në Shqipëri dhe jashtë saj, ose u tërhoq në para të gatshme nga përfaqësuesi me prokurë i shoqërisë, shtetasi C.
Pas kësaj lëvizjeje masive fondesh, llogaritë bankare të kompanisë X u mbyllën, çka e bëri edhe më të fortë dyshimin se bëhej fjalë për një aktivitet të qëllimshëm për të qarkulluar dhe zhdukur gjurmët e parave.
Aktivitet i pamundur për një kompani që nuk ka as zyra
Hetimi nxori në dritë edhe disa kontradikta flagrante. Shoqëria X nuk kishte deklaruar asnjë pajisje zyre apo makineri informatike, përveç administratorit A si punonjës. Megjithatë, në dokumentet tatimore kishte deklaruar shitje të barabarta me vlerën e transfertave – rreth 10 milionë euro – gjë që ngre pikëpyetje serioze për mundësinë reale të këtij aktiviteti.
Gjithashtu, kompania kishte ndërruar disa herë adresën e saj të regjistruar në qytete të ndryshme të Shqipërisë, një praktikë që AIF e konsideron të zakonshme në rastet e shmangies së kontrolleve fiskale.
Lidhjet me kompani të tjera dhe arrestimet
Në mars 2022, shoqëria X pezulloi aktivitetin. Pas një viti, aksionari i huaj ia shiti kuotat shtetasit shqiptar H, i cili e rifilloi aktivitetin për disa muaj, për ta pezulluar sërish në gusht 2023 dhe për ta çuar në likuidim. Por historia nuk mbaron këtu. Sipas AIF, H kishte ndjekur të njëjtën skemë edhe me një tjetër kompani, Y, të cilën e krijoi dhe ia shiti menjëherë një shtetasi tjetër të huaj, të lidhur me të njëjtin rrjet si B.
Në mars 2024, shtetasi H dhe përfaqësuesi me prokurë C u arrestuan dhe janë nën hetim për pastrim parash. Procedimi penal për këtë rast është regjistruar nga organet kompetente pas referimit të çështjes nga Autoriteti i Inteligjencës Financiare.
Hetimet vazhdojnë
Rasti konsiderohet nga autoritetet si një nga skemat më të sofistikuara të zbuluara kohët e fundit në vend, që përfshin kompani guackë, transferta nga juridiksione të dyshimta dhe një rrjet individësh të lidhur që veprojnë nën një strukturë të organizuar.
AIF ka dorëzuar të gjithë dokumentacionin për hetim të mëtejshëm dhe hetimet për këtë rast vazhdojnë në bashkëpunim me partnerët ndërkombëtarë. /skyweb.al
