Forcat Ajrore Kroate morën në dorëzim avionin e fundit luftarak Rafale, duke përmbyllur procesin e modernizimit të flotës së tyre ajrore. Lajmi u konfirmua nga Ministria e Mbrojtjes së Kroacisë përmes një postimi zyrtar në rrjetin X.
Avioni i dymbëdhjetë Rafale u ul në Aeroportin “Franjo Tuđman”, duke plotësuar formimin e një skuadriljeje të me këtë model avionësh. Të gjithë avionët Rafale i janë bashkuar Skuadriljes së 194 duke zëvendësuar përfundimisht avionët MiG-21 që për shumë vite kishin qenë boshti kryesor i Forcave Ajrore Kroate.
Marrëveshja për blerjen e 12 avionëve Rafale F3R u nënshkrua me Francën në nëntor të vitit 2021, si pjesë e përpjekjeve të Kroacisë për modernizimin e kapaciteteve të saj mbrojtëse. Gjashtë avionët e parë mbërritën në prill 2024, ndërsa pjesa e mbetur u dorëzua deri në prill 2025.
Kontrata ka një vlerë prej 999 milionë euro, me pagesa të ndara në 5 këste nga viti 2022 deri në vitin 2026.
Përveç furnizimit me avionë, marrëveshja përfshin edhe armë, pjesë këmbimi, mbështetje logjistike për tre vjet dhe trajnim për pilotët dhe teknikët në Francë. /skyweb.al
