Agjencia Kombëtare e Shoqërisë së Informacionit (AKSHI) vazhdon të funksionojë si një minierë ari për klientelën dhe firmat e lidhura me pushtetin, përmes tenderave të përjavshëm me vlera marramendëse.
Institucioni që menaxhon teknologjinë e qeverisë shqiptare ka hapur së fundmi një nga tenderat më të mëdhenj të viteve të fundit, një procedurë me fond limit mbi 16 milionë euro për “pajisje teknologjike për përdorim zyre”.
Sipas dokumenteve të siguruara nga VoxNews, tenderi është publikuar më 4 qershor dhe parashikon blerjen e “pajisjeve të ndryshme kompjuterike”, por nuk përcaktohet as institucioni përfitues, as numri i përdoruesve, dhe as përfituesit e drejtpërdrejtë të këtyre pajisjeve.
Fondi limit i tenderit është 1,595,729,257 lekë, një shumë që ngre pikëpyetje serioze për justifikimin dhe nevojën reale të blerjeve të tilla në një kohë kur shumë institucione të tjera vuajnë nga mungesa e infrastrukturës bazë.
Burime brenda tregut tregojnë se për tendera të kësaj natyre, klientë të njohur të AKSHI-t kanë krijuar klane të përfolura për lidhje politike, që garojnë në mënyrë fiktive dhe e ndajnë fitimet nëpërmjet nënkontraktorëve të kontrolluar.
Madje, mes kompanive të përfshira ka pasur edhe përplasje të forta, ku disa prej tyre i janë drejtuar Komisionit të Prokurimit Publik, duke denoncuar padrejtësi dhe favorizime në tenderim.
Skyweb.al ka raportuar më herët në lidhje me bërrylat mes dy-tre kompanive që marrin pjesën e luanit të tenderëve të AKSHI-t, ndërsa pritet të shihet se kush do të jetë fatlumi për këto 16 milionë euro. /skyweb.al
