Shqipëria synon të kalojë nga turizmi masiv drejt një modeli turistik me më shumë vlerë të shtuar për ekonominë. Me numrin e turistëve që ka kaluar 12 milionë, sfida e radhës, sipas Kryeministrit Edi Rama, është rritja e cilësisë dhe krijimi i kushteve për zhvillimin e turizmit elitar.
Gjatë “Future Hospitality Forum 2026”, Rama tha se fluksi i lartë i turistëve me shpenzime më të ulëta krijon presion mbi mjedisin, shërbimet, infrastrukturën dhe komunitetet, ndaj fokusi duhet të jetë te tërheqja e markave ndërkombëtare dhe investimeve në hotele luksoze.
“Duhet të krijojmë më shumë hapësirë dhe kushte për ekselencën që të vijë dhe të bëhet forcë për vendin”, u shpreh Rama, duke shtuar se synimi është krijimi i infrastrukturës së nevojshme për të tërhequr më shumë marka të mëdha dhe turistë me nivel më të lartë shpenzimesh.
Kryeministri tha se Shqipëria ka ende potencial për të tërhequr investime të rëndësishme në këtë sektor, ndërsa u bëri apel investitorëve të mos e humbin momentin.
Ai solli në vëmendje edhe një bisedë me një investitor amerikan, të cilit fillimisht i kishte kërkuar të investonte në Shqipëri. Sipas Ramës, investitori i ishte përgjigjur se vendi nuk ishte ende gati, ndërsa kur më vonë vendosi të vinte, përgjigjja e Kryeministrit ishte se “Shqipëria nuk ka kohë për ty”.
Për Ramën, mesazhi për investitorët është i qartë: të shfrytëzojnë mundësitë tani, pasi rritja e kërkesës për Shqipërinë mund ta bëjë më të kufizuar hapësirën për investime në të ardhmen.
