Të gjithë individët dhe subjektet që ofrojnë apartamente me qira përmes platformave si Booking dhe AirBnB do të jenë nën vëzhgim të shtuar këtë sezon veror.
Administrata Tatimore ka nisur zbatimin e Planit të Turizmit 2025, që parashikon kontrolle më të forta për deklarimin e të ardhurave dhe pagesën e detyrimeve tatimore nga operatorët që operojnë në tregun e qirave afatshkurtra.
Pjesë e këtij plani është krahasimi i çmimeve të ofertave online me të dhënat e fiskalizimit, me synim evidentimin e mospërputhjeve në xhiro të padeklaruar. Tatimet kanë identifikuar si zonë kritike periudhën Qershor–Shtator, kohë në të cilën do të intensifikohen kontrollet në terren për strukturat që vlerësohen me risk të lartë.
Një tjetër komponent i ri i strategjisë është bashkëpunimi me administratën tatimore irlandeze, për të hetuar rastet e individëve që përfitojnë të ardhura nga platformat ndërkombëtare të rezervimit, por nuk i deklarojnë ato. Tatimet u kanë kërkuar qytetarëve të përfshihen vetë në procesin e deklarimit përmes formularit të Deklaratës Individuale Vjetore të të Ardhurave (DIVA).
Sipas të dhënave të tregut, aktualisht në platforma të ndryshme figurojnë mbi 18,200 struktura aktive me qira afatshkurtër. Ky sektor është kthyer tashmë në një burim të rëndësishëm të ardhurash për disa kategori qytetarësh: nga ata që marrin me qira afatgjatë ambiente për t’i nënqiradhënë me tarifa ditore, deri te pronarët që shfrytëzojnë apartamente të pambanuara për fitime sezonale.
Ndërsa për individët me vetëm një njësi në pronësi fitimet janë modeste, për ata që e kanë kthyer këtë aktivitet në biznes të mirëfilltë, përfitimet janë të konsiderueshme për shkak të strukturës së ulët të kostove dhe kërkesës së lartë në sezon.
Fushata e re pritet të sjellë një formalizim të mëtejshëm të sektorit të qirave afatshkurtra, duke garantuar trajtim të barabartë për të gjithë operatorët dhe rritje të të ardhurave në buxhetin e shtetit. /skyweb.al
