Shqipëria renditet në vendin e 77 në botë për cilësinë e jetesës sipas raportit të fundit të publikuar nga platforma ndërkombëtare Numbeo për vitin 2025.
Me një indeks prej vetëm 104.3 pikësh, Shqipëria është e fundit në Europë dhe më e ulëta në rajonin e Ballkanit Perëndimor.
Të gjitha vendet fqinje, përfshirë Malin e Zi, Serbinë, Maqedoninë e Veriut, Bosnjën dhe Kosovën, renditen më lart në këtë indeks global, duke e lënë Shqipërinë në fund të rajonit. Italia mban vendin e 40, ndërsa Greqia renditet në vendin e 46.
Ajo që e bën më shqetësuese këtë renditje është fakti se edhe vende që përballen me luftë apo krizë të thellë ekonomike renditen më mirë. Ukraina, ndonëse në luftë që nga viti 2022, ndodhet në vendin e 67.
Irani, i cili është prej vitesh nën sanksione të ashpra ndërkombëtare, renditet në vendin e 84, ndërsa Libani, në krizë të thellë politike dhe ekonomike, zë vendin e 78.
Sipas metodologjisë së Numbeo, cilësia e jetesës matet duke analizuar faktorë si fuqia blerëse, siguria, kujdesi shëndetësor, kostoja e jetesës, ndotja, klima dhe infrastruktura e transportit. Shqipëria rezulton me vlera të ulëta në shumicën e këtyre kategorive, veçanërisht në fuqinë blerëse, ndotjen mjedisore dhe cilësinë e shërbimeve shëndetësore, raporton Skyweb.al.
Në krye të renditjes për vitin 2025 janë Luksemburgu, Holanda dhe Danimarka, të cilat ofrojnë standarde shumë të larta jetese, infrastrukturë të avancuar dhe siguri të lartë për qytetarët e tyre.
Renditja e Shqipërisë në fund të Europës është një tregues i qartë se përmirësimet e shpallura në ekonomi nuk po reflektohen në cilësinë reale të jetesës për qytetarët, duke thelluar kontrastin me vendet e tjera të rajonit dhe kontinentit./skyweb.al
