Operatori i Shpërndarjes së Energjisë Elektrike (OSHEE) ka miratuar një paketë të re masash për stimuluar vijimin e pagesave nga abonentë që kanë detyrime të papaguara, duke përfshirë familjarët dhe bizneset. Këto skema do të zbatohen nga data 21 korrik dhe vlejnë për faturat e energjisë të mbetura pa shlyer deri në fund të vitit 2023.
Kusht për përfitimin nga këto lehtësira është që abonentët të kenë shlyer të gjitha detyrimet e vitit 2024 e në vijim. Skemat përfshijnë pagesa me këste mujore fikse, të përcaktuara në bazë të kategorisë së klientit dhe vlerës së borxhit të akumuluar.
Përkatësisht, familjet që përfitojnë ndihmë ekonomike dhe pensionistët do të mund të shlyejnë detyrimet me këste mujore prej 1,200 lekësh, ndërsa familjet e tjera do të përfshihen në një plan me pagesa mujore prej 2,800 lekësh. Ndërkohë, për bizneset është hartuar një plan që lejon shlyerjen e detyrimeve në deri në 120 këste, sipas vlerës së borxhit të secilit subjekt.
Paralelisht, OSHEE ka aprovuar edhe një skemë për uljen e kamatëvonesave. Kështu, abonentët familjarë që shlyejnë menjëherë të gjithë borxhin e mbartur do të përfitojnë ulje të kamatëvonesës me 70%, ndërsa klientët jofamiljarë do të përfitojnë një ulje të plotë në masën 100%.
Për të përfituar nga këto masa lehtësuese, klientët duhet të paraqiten pranë sporteleve të Kujdesit ndaj Klientit për të firmosur marrëveshjen përkatëse me OSHEE. /skyweb.al
