Ryanair do të shtojë 25 avionë të rinj Boeing 737 MAX 8-200 disa muaj përpara afatit, një zhvillim që CEO Michael O’Leary e cilëson si shtysë për rritjen e kapaciteteve dhe uljen e mëtejshme të çmimeve të biletave.
Avionët, që pritej të mbërrinin pranverën e ardhshme, do të dorëzohen tashmë deri në tetor 2025 falë një marrëveshjeje të përshpejtuar me Boeing.
Lëvizja është e veçantë duke marrë parasysh marrëdhëniet e tensionuara mes dy kompanive. Vetëm disa muaj më parë, O’Leary kërcënoi se do të anulonte miliarda dollarë në porosi për shkak të tarifave dhe vonesave, madje duke përmendur edhe avionin kinez COMAC C919 si alternativë.
Por me përmirësimin e kontrollit të cilësisë dhe shpejtimin e dorëzimeve nga Boeing, qëndrimi i Ryanair është zbutur.
Kompania “low-cost” më e madhe në Europë operon tashmë mbi 600 avionë, ndërsa ka në pritje gati 200 të tjerë.
Modelet e reja MAX 8-200, secili me kapacitet 197 pasagjerë, do të ndihmojnë në rinovimin e flotës dhe në shtimin e vendeve për çdo fluturim, duke ruajtur moshën mesatare të ulët të avionëve./skyweb.al
