Revista prestigjioze e udhëtimeve Lonely Planet i ka kushtuar një artikull të posaçëm kryeqytetit shqiptar, duke listuar 20 eksperiencat më të bukura për t’u përjetuar në Tiranë. Autorja Laura Millar shkruan se qyteti, i izoluar për dekada nga regjimi komunist, po shndërrohet sot në një destinacion gjithnjë e më kozmopolit, ku vizitorët mund të gjejnë një miks unik historie, arkitekture dhe kulture.
Lista nis me Xhaminë e Namazgjasë, më e madhja në Ballkan, e hapur në vitin 2024 dhe e frymëzuar nga arkitektura osmane.
Në qendër të kryeqytetit, Sheshi Skënderbej dhe statuja e heroit kombëtar janë atraksione të domosdoshme, ndërsa Xhamia e Et’hem Beut me afresket e saj të rralla dhe Kulla e Sahatit sjellin një udhëtim në kohë.
Mes rekomandimeve janë edhe Kalaja e Tiranës dhe Muzeu Historik Kombëtar, ku mozaiku i madh “Shqiptarët” përshkruan historinë e vendit, si dhe Parku i Liqenit Artificial, një hapësirë e gjelbër për shëtitje e rekreacion.
Për ata që duan panoramë, teleferiku i Dajtit çon për 15 minuta mbi majat e malit, me pamje spektakolare drejt Tiranës dhe Adriatikut.
Lonely Planet sugjeron gjithashtu vizitat në Bunk’Art 1 dhe 2, muze të vendosur në bunkerë të periudhës komuniste, në Piramidën e Tiranës tashmë e transformuar në qendër inovacioni, si dhe në Vilën 31, rezidencën e Enver Hoxhës e kthyer në hapësirë arti. Blloku, dikur i ndaluar, sot është zemra e jetës së natës me bare dhe restorante moderne.
Në listë nuk mungojnë Muzeu Arkeologjik Kombëtar, Pazari i Ri plot produkte vendase, Shtëpia e Gjetheve ku ekspozohen pajisjet e përgjimit të Sigurimit, si dhe Ura e Tabakëve, një relike osmane mbi lumin Lana.
Sipas Lonely Planet, Tirana është një qytet që kombinon kujtesën historike me energjinë e së tashmes, duke ofruar për turistët ndërthurjen e veçantë mes kulturës, historisë dhe argëtimit modern. /skyweb.al
