Autoriteti Kombëtar për Sigurinë Kibernetike (AKSK) ka reaguar pas rasteve të shumta mashtrimi përmes një platforme të vetëquajtur TXEX, e prezantuar si aplikacion për investime në kriptovaluta.
Ky subjekt nuk është i regjistruar dhe as i licencuar në Shqipëri, ndaj operon jashtë çdo kuadri ligjor kombëtar.
Sipas AKSK, TXEX mbart tiparet e qarta të një skeme mashtruese digjitale. Platforma përdor reklama të rreme në rrjete sociale si Instagram apo TikTok, krijon grupe komunikimi false në Telegram dhe WhatsApp, publikon fitime të fabrikuara për të joshur viktimat dhe më pas kërkon pagesa shtesë për “verifikim” ose “tërheqje fondesh”. Për më tepër, ajo mbledh dokumente personale si karta identiteti dhe foto, duke rritur rrezikun për abuzim me të dhënat sensitive.
AKSK paralajmëron se përfshirja në këtë platformë sjell humbje financiare të parikuperueshme dhe rrezik të lartë për cënimin e privatësisë dhe identitetit digjital. Institucioni kujton qytetarët se asnjë subjekt i palicencuar nuk ka të drejtë të ofrojë shërbime financiare në Shqipëri, ndërsa premtimet për fitime të shpejta janë shenjë klasike mashtrimi.
Për të shmangur pasojat, qytetarëve u kërkohet të mos kryejnë transaksione me TXEX, të mos ndajnë të dhëna personale me subjekte të panjohura dhe të raportojnë menjëherë çdo rast të dyshimtë. /skyweb.al
