Tre persona janë vënë në pranga, me kërkesë të Prokurorisë së Beratit, pasi Kroacia bllokoi dhe asgjesoi rreth 8 ton domate me pesticide të eksportuara nga Shqipëria.
Policia ka arrestuar administratorin e subjektit eksportues “Era fruit”, Mariglen Qorri si edhe dy inspektorë të AKU-së në Berat, Ronaldo Lika dhe Griselda Doksani. Nga hetimet ka rezultuar se administratori i subjektit, ka prodhuar dhe më paseksportuar drejt shtetit kroat, 8 ton domate të cilat pas analizave të kryera rezultuan me përbërje të lartë të preparatit “Chlorefenapyr”.
Për të shmangur përgjegjësisë ligjore Mariglen Qorri ka përdorur faturë fiktive blerjeje nga fermerë të tjerë dhe e ka përdorur për praktikat doganore. Dy inspektorët, akuzohen se kanë tjetërsuar faktet në lidhje me origjinën e produktit të konstatuar me probleme, pasi edhe pse kanë konstatuar shkeljet nga subjekti, kanë marrë si të rregullta faturat fiktive, të pa firmosur nga fermeri/shitësi.
Gjatë kontrollit të ushtruar në magazinën e subjektit u sekuestruan perime të ndryshime si edhe u morën mostrat për analizat pasi dyshohet se mund të jenë me përbërje të lartë preparatesh. /Skyweb.al
