Kryeministri Edi Rama shpall sot qeverinë e tij të katërt, pas fitores së zgjedhjeve me 83 mandate, një shumicë e cila i garanton mbështetje solide në Kuvend.
Në Asamblenë e Përgjithshme të Partisë Socialiste, që zhvillohet në Pallatin e Kongreseve, pritet të zbulohen emrat e ministrave të rinj.
Rama ka dhënë sinjale se kabineti i ri do të ketë më shumë teknicienë sesa figura politike, duke u mbështetur te fakti se politika e vërtetë përfaqësohet nga ai vetë. Ky orientim duket i lidhur edhe me rritjen e presionit të institucioneve të reja të drejtësisë, BKH dhe SPAK, ndaj figurave të ngarkuara me probleme, gjë që e bën të nevojshme zgjedhjen e individëve me profile të pastra.
Përveç kësaj, pritet që ministrat të kenë më pak hapësirë politike dhe më shumë rol teknik, pasi Rama ka konsoliduar prej kohësh vendimmarrjen në Kryeministri, duke e shtrirë kontrollin si në pushtetin qendror ashtu edhe në atë vendor.
Në këtë kuadër, ministrat e rinj më shumë pritet të jenë firmëtarë e zbatues të detyrave sesa politikëbërës.
Në ditët e fundit në rrjete sociale ka qarkulluar një listë me emra të mundshëm, por ajo duket më shumë si një listë dëshirash sesa një parashikim real.
Tradita e deritanishme e Ramës ka treguar se emrat e ministrave shpesh janë bërë publikë në momentin e fundit, madje disa prej tyre kanë mësuar për emërimin ose shkarkimin e tyre vetëm gjatë mbledhjes së Asamblesë.
Për këtë arsye, pritshmëritë për kabinetin e ri janë të larta, por edhe të mbështjella me mister.
Tashmë mbetet vetëm të hapet “kutia e Kinder Surprise” e kryeministrit, ku do të mësohet se kush do të jenë ministrat e mandatit të katërt të qeverisë Rama. /skyweb.al
