Kontrolli i Lartë i Shtetit kreu një auditim të posaçëm mbi Liqenin Artificial të Tiranës pas konstatimit të ndotjes së tij në fund të vitit 2024.
Ky auditim hedh dritë mbi problemet e menaxhimit, shkaqet e ndotjes, mungesën e koordinimit institucional dhe mosmarrjen e masave për të frenuar dëmin mjedisor në një nga hapësirat më të rëndësishme të gjelbra të kryeqytetit.
Raporti evidenton se ujërat e liqenit janë ndotur nga shkarkime urbane të patrajtuara, me prani të lëndëve pezull dhe fosfateve në nivele të larta, si dhe me mungesë oksigjeni të tretur.
Analizat treguan lulëzimin e cianobakterit Microcystis aeruginosa, që sinjalizon një fazë të avancuar eutrofikimi, me pasoja të rënda për ekosistemin dhe shëndetin publik.
Edhe pse ndotja ishte e dokumentuar, deri në fillim të vitit 2025 nuk u morën masa konkrete për identifikimin e burimeve dhe ndalimin e tyre.
Një nga gjetjet kryesore është mungesa e rrjetit të kanalizimit brenda Parkut të Madh të Liqenit, çka ka detyruar subjektet që operojnë aty të përdorin gropa septike të pambikëqyrura.
Nga verifikimet në terren, grupi i auditimit konstatoi se numri i subjekteve është më i lartë nga sa raportojnë institucionet si UKT apo APR, duke treguar mungesë kontrolli dhe transparence.
Auditimi ka evidentuar gjithashtu raste ku uji i ndotur urban dhe ujërat e zeza derdhen në liqen përmes kanaleve të shiut, duke përkeqësuar gjendjen ekologjike dhe duke krijuar erëra të pakëndshme.
Matjet e kryera në janar 2025 treguan përmbajtje të lartë të fosforit dhe nivel shumë të ulët të oksigjenit, duke paralajmëruar rrezikun e shtimit të ndotjes në periudhën e verës.
Sipas raportit, mungesa e një plani menaxhimi nga Bashkia e Tiranës dhe monitorimit të rregullt nga Agjencia Kombëtare e Mjedisit dhe Agjencia e Parqeve dhe Rekreacionit ka lënë një boshllëk institucional të dukshëm. Kjo ka bërë që ndotja të vazhdojë pa ndërprerje, duke rrezikuar shëndetin e gjallesave dhe funksionin rekreativ të liqenit.
Në përfundim, KLSH rekomandon:
-
Monitorim të vazhdueshëm të cilësisë së ujit sipas programit kombëtar,
-
Evidentim dhe izolim të të gjitha pikave të shkarkimit,
-
Masa administrative ndaj subjekteve ndotëse,
-
Ngritje të një grupi të përhershëm ndërinstitucional për menaxhimin e parkut.
Raporti nënvizon se neglizhenca dhe mungesa e bashkërendimit mes institucioneve gjatë vitit 2024 e kanë lënë Liqenin Artificial të Tiranës në një gjendje të rënduar ekologjike, me pasoja serioze për mjedisin dhe komunitetin. /skyweb.al
