Iu ka ndodhur të udhëtoni me avion natën dhe ndoshta e keni vënë re që dritat Brenda kabinës fiken ose bëhen më të zbehta gjatë uljes apo ngritjes së avionit.
Duket si një detaj i vogël, ndoshta për të krijuar një atmosferë më të qetë. Por në të vërtetë, kjo ka një arsye shumë më të rëndësishme, sigurinë e pasagjerëve.
Gjatë uljes dhe ngritjes, rreziku për një emergjencë, siç mund të jetë një evakuim i shpejtë, është më i lartë krahasuar me pjesën tjetër të fluturimit. Në raste të tilla, çdo sekondë është e rëndësishme. Prandaj, fikja e dritave ndihmon që sytë e pasagjerëve të përshtaten me errësirën. Kjo do të thotë që, nëse duhet të lëvizësh shpejt në një ambient pa ndriçim të plotë ose të shohësh jashtë në terr, do të jesh më i përgatitur.
Në një situatë emergjente, nëse kabina është shumë e ndriçuar dhe papritur del jashtë ku është errësirë, sytë e tu do të kenë nevojë për disa sekonda që të përshtaten, dhe këto sekonda mund të jenë jetike. Me fikjen paraprake të dritave, trupi yt është gati për të reaguar më shpejt në një situatë të paparashikuar.
Kjo është një nga ato masa sigurie që shumica e udhëtarëve as nuk e kuptojnë, por që tregon sa i avancuar është sistemi i sigurisë në aviacion. Çdo vendim, qoftë edhe për dritat e kabinës, bazohet në analiza të thella të rrezikut dhe përgatitjes për çdo skenar. /Skyweb.al
