Komisioni Evropian ka konstatuar paraprakisht se TikTok ka shkelur Aktin për Shërbimet Digjitale, për shkak të një dizajni që nxit përdorim të tepruar dhe shkaktimit të varësisë, veçanërisht te fëmijët dhe të rinjtë.
Sipas Komisionit, funksione si “scrollet” e pafundme, luajtja automatike e videove, njoftimet e shpeshta dhe algoritmet ultra të personalizuara e mbajnë përdoruesin të angazhuar pa ndërprerje reale dhe pa kontroll të vetëdijshëm mbi kohën e përdorimit.
Hetimi vlerëson se TikTok nuk ka analizuar siç duhet rreziqet për shëndetin mendor, përfshirë përdorimin gjatë natës nga të miturit dhe shenjat e sjelljeve kompulsive.
Masat mbrojtëse të deklaruara nga kompania, si kufizimet e kohës së ekranit dhe kontrollet prindërore, konsiderohen të pamjaftueshme dhe të lehta për t’u anashkaluar.
Komisioni thekson se problemi lidhet me vetë dizajnin e platformës dhe jo vetëm me mënyrën e përdorimit.
Mes ndryshimeve të kërkuara përmenden kufizimi i “scrolleve” të pafundme, ndërprerjet e detyrueshme të përdorimit dhe rishikimi i algoritmit të rekomandimeve.
Këto janë përfundime paraprake. TikTok ka të drejtën e mbrojtjes. Nëse shkeljet konfirmohen, kompania rrezikon gjobë deri në 6 për qind të xhiros vjetore globale.
Hetimi është pjesë e një procedure më të gjerë, e nisur në shkurt 2024, për mbrojtjen e të miturve dhe sigurinë digjitale. /skyweb.al
