Popullsia e Shqipërisë është rritur gjatë tremujorit të tretë të vitit 2025, duke regjistruar një shtesë natyrore pozitive me 1,347 lindje më shumë se vdekje.
Ky është një sinjal i rëndësishëm për zhvillimin demografik të vendit, që tregon përmirësim të ekuilibrit mes lindjeve dhe vdekjeve pas disa viteve me bilanc negativ.
Sipas të dhënave të publikuara nga INSTAT, në këtë periudhë janë regjistruar 6,408 lindje, me një rënie të lehtë prej 1.2% krahasuar me të njëjtën periudhë të vitit 2024, ndërsa vdekjet kanë zbritur në 5,061, duke shënuar një ulje të ndjeshme prej 11.6%.
Nga 12 qarqet e vendit, shtatë kanë regjistruar shtesë natyrore pozitive, ndërsa pesë qarqe të tjera kanë shënuar vlera negative. Tirana vazhdon të mbetet qendra kryesore e rritjes demografike, me 1,238 lindje më shumë se vdekje, duke konfirmuar rolin e saj si “motorr” i popullsisë dhe i zhvillimit ekonomik. Në të kundërt, Korça renditet si qarku me shtesën më të ulët natyrore, duke reflektuar një ritëm më të ngadaltë të rritjes së popullsisë.
Në shpërndarjen sipas qarqeve, Tirana kryeson me numrin më të madh të lindjeve, ndërsa Gjirokastra mbetet me më pak lindje, vetëm 81 gjatë tremujorit. Në anën tjetër, për nga vdekjet, Kukësi ka shënuar numrin më të ulët me 100 raste, ndërsa Tirana ka regjistruar më të lartin, me 1,271 raste, në përpjesëtim me popullsinë e saj të madhe.
Sipas ekspertëve, ky bilanc pozitiv i lindjeve ndaj vdekjeve është një tregues i rëndësishëm për stabilizimin e popullsisë dhe kërkon mbështetje përmes politikave të qëndrueshme në shëndetësi, kujdes social dhe stimulimin e familjeve të reja, sidomos në zonat me rënie demografike. /skyweb.al
