Një bar-restorant në zonën e Golemit, është penalizuar nga Administrata Tatimore pas një inspektimi të kryer nga Task Forca e Terrenit, e cila konstatoi një sërë shkeljesh të rënda të legjislacionit tatimor.
Në kuadër të zbatimit të Planit të Turizmit dhe nismës për formalizimin e sektorit, përmes analizës së riskut, u evidentuan rreth 590 mijë euro të ardhura të fshehura nga aktiviteti i subjektit në periudhën 2020–2025. Gjatë kontrollit, u zbuluan edhe shkelje të tjera si tregtimi i mallrave pa faturë, moslëshimi i faturave për klientët, mungesa e autofaturave, si dhe punonjës të padeklaruar.
Në vijim të inspektimit, Administrata Tatimore sekuestroi dy pajisje kompjuterike që përdoreshin nga subjekti, të cilat përmbanin të dhëna që provonin fshehjen e të ardhurave dhe praktikat e tjera të paligjshme.
Sipas njoftimit zyrtar, këto veprime përbëjnë shkelje të drejtpërdrejta të ligjit dhe penalizimi i subjektit është pjesë e masave të ndërmarra për të luftuar informalitetin në sektorin e turizmit, një ndër prioritetet kryesore të strategjisë kombëtare për formalizimin e ekonomisë.
Administrata Tatimore ka theksuar se nuk do të tolerojë asnjë subjekt që operon jashtë kuadrit ligjor dhe ka paralajmëruar se kontrollet dhe ndërhyrjet do të vijojnë me fokus të shtuar, veçanërisht në zonat turistike dhe në periudha të ngarkuara sezonale. /Skyweb.al
