Një studim i thelluar mbi gatishmërinë teknologjike të strukturave hoteliere dhe akomoduese në Shqipëri është publikuar së fundmi në revistën shkencore ndërkombëtare Tourism and Hospitality (MDPI), e cila renditet ndër më prestigjiozet në fushën e turizmit dhe mikpritjes.
Studimi përfshin analizën e 1821 strukturave të licencuara hoteliere dhe akomoduese në vend, duke përfaqësuar kontributin më të madh empiriko-statistikor në Shqipëri deri më sot për këtë tematikë. Rezultatet e tij kanë rëndësi të veçantë jo vetëm për imazhin ndërkombëtar të turizmit shqiptar, por edhe për hartimin e politikave publike, strategjitë e investimeve dhe forcimin e lidhjeve ndërmjet akademisë dhe industrisë, si në nivel rajonal ashtu edhe global.
Projekti është realizuar në kuadër të një bashkëpunimi ndërinstitucional ndërmjet Fakultetit të Ekonomisë të Universitetit të Tiranës, INSTAT, AKSHI-t dhe aktorëve të industrisë turistike.
Bazuar në analizën tipologjike, strukturat klasifikohen në tre grupe kryesore:
-Liderë Teknologjikë (17.7%) – që përqafojnë aktivisht inovacionin;
-Përdorues Selektivë (43.5%) – që përdorin teknologjinë në mënyrë të pjesshme;
-Skeptikë (38.8%) – me rezistencë ndaj transformimit digjital.
Teknologjitë më të përhapura përfshijnë robotë për pastrim, çelësa inteligjentë, kamera të sigurisë, sensorë për kursimin e energjisë, si dhe sisteme për komunikim dhe përgjigje automatike ndaj klientëve. Këto zgjidhje kanë kontribuar në përmirësimin e lidhjes ndërmjet shërbimeve të hoteleve shqiptare dhe platformave ndërkombëtare të turizmit. /Skyweb.al
