Një incident serioz është regjistruar mbrëmjen e së dielës në aeroportin Côte d’Azur në Nice të Francës, ku për pak sa nuk ndodhi një përplasje katastrofike mes dy avionëve pas një uljeje të gabuar. Një avion i kompanisë tuniziane Nouvelair, një Airbus A320 që vinte nga Tunizia, tentoi të ulej në pistën e gabuar, duke hyrë në një trajektore të rrezikshme drejt një avioni tjetër që ndodhej në pistë.
Sipas raportimeve, piloti i Nouvelair ishte autorizuar të ulej në pistën 4 majtas, por gabimisht ai ndoqi drejtimin për në pistën 4 djathtas, ku ndodhej një avion i kompanisë EasyJet që po përgatitej për ngritje.
Dy avionët ndodheshin në një distancë prej vetëm 1,100 metrash nga njëri-tjetri, ndërsa avioni nga Tunizia afrohej me shpejtësi prej rreth 260 kilometrash në orë. Kalimi i tij mbi avionin tjetër ndodhi në një lartësi prej 15.24 metrash, ndërkohë që bishti i një A320 është rreth 11.75 metra i lartë. Diferenca mes tyre ishte vetëm 3.49 metra, një distancë e frikshme që për pak sa nuk solli një tragjedi në pistë.
Menjëherë pas incidentit, piloti tunizian ndërpreu uljen dhe arriti të pozicionohej sërish për t’u ulur në pistën e duhur disa minuta më vonë. Fluturimi i EasyJet u anulua, ndërsa autoritetet franceze kanë nisur një hetim të thelluar për të zbardhur rrethanat që çuan në këtë gabim potencialisht fatal. Ministri francez i Transportit ka kërkuar nga agjencia për hetimin e aksidenteve ajrore (BEA) një analizë të plotë të situatës.
Ky është një ndër rastet më të rënda të shmangies për pak të një aksidenti ajror në tokë, duke ngritur shqetësime serioze për procedurat e kontrollit të trafikut ajror dhe koordinimin mes kullave të kontrollit dhe pilotëve. /Skyweb.al
