Kryeministri Edi Rama i ka besuar zv.kryeministres Belinda Balluku drejtimin politik të Partisë Socialiste në Tiranë, duke i dhënë asaj një rol kyç në betejën e ardhshme zgjedhore për kryeqytetin. Ky zhvillim vjen pas shkarkimit të Erion Veliajt dhe shihet si goditja përfundimtare ndaj tij, në kushtet e një rivaliteti të kahershëm mes dy figurave të larta socialiste.
Pritet që Balluku të angazhojë forca të shumta njerëzore dhe burime buxhetore, me qëllim sigurimin e një fitoreje bindëse për Ogerta Manastirliun, e shpallur tashmë si kandidate zyrtare e PS-së për Bashkinë e Tiranës.
Në fjalën e tij, Rama theksoi se mbështetja për Manastirliun është unanime brenda Partisë Socialiste dhe se rivalët politikë do të hyjnë në një garë të humbur. “Është radha e Ogertës për të udhëhequr Tiranën”, u shpreh kryeministri, duke shtuar se sfida kryesore është adresimi i problemeve të akumuluara në bashki, që sipas tij kanë çuar në një nivel minimal të prokurimeve publike dhe rënie të investimeve.
Balluku, e cila në zgjedhjet e majit siguroi një rezultat rekord në qarkun e Fierit me 12 mandate, pritet të përdorë eksperiencën e saj organizative për të garantuar që kryeqyteti të mbetet nën kontrollin e Partisë Socialiste. Angazhimi i saj shihet si një provë force e Ramës për të konsoliduar lidershipin dhe për të shmangur çdo tentativë të brendshme përçarjeje pas largimit të Veliajt.
Me këtë lëvizje, balanca e pushtetit brenda PS-së ndryshon dukshëm, duke i dhënë Ballukut një terren të ri politik, ku ajo nuk ka më rivalë. /skyweb.al
