Sipas një studimi të Bankës Botërore, qytetarët shqiptarë janë më pak të informuarit në Ballkan për sa i përket programeve qeveritare që mbështesin eficiencën energjetike dhe mbrojtjen e mjedisit.
Vetëm një përqindje e vogël e popullsisë ka dijeni për ndihmat apo politikat që lidhen me menaxhimin e mbetjeve, përdorimin e paneleve diellore, sistemet moderne të ngrohjes dhe ftohjes, si dhe pajisjet energjetikisht efikase.
Sipas të dhënave, vetëm 24% e qytetarëve shqiptarë deklarojnë se janë në dijeni për mbështetjen e qeverisë në menaxhimin e mbetjeve, një nivel dukshëm më i ulët se në Bosnjë-Hercegovinë (49%) apo Serbi (33%). Në këtë tregues, Shqipëria lë pas vetëm Gjeorgjinë (45%) dhe Uzbekistanin (18%), ndërsa Moldavia edhe (55%) dhe Turqia (58%) tregojnë ndërgjegjësim më të lartë.
Sa i përket paneleve diellore, Shqipëria ka një rezultat disi më të favorshëm, sipas Bankës Botërore ku rreth 61% e qytetarëve njohin programet qeveritare në këtë fushë. Megjithatë, vendi ynë edhe në këtë tregues ngelet pas Bosnjë-Hercegovinës (78%) dhe Serbisë (71%), që janë ndër më të avancuarat në Ballkan. Në krahasim me shtetet e BE-së si Kroacia (73%) apo Polonia (71%), Shqipëria shënon një diferencë të ndjeshme. Edhe Moldavia (75%) dhe Armenia (84%) tregojnë ndërgjegjësim më të lartë në lidhje me programet qeveritare për panelet diellore.
Në krahasim me vendet fqinje si Bosnja, Serbia apo Kosova, Shqipëria renditet e fundit sa i përket ndërgjegjësimit dhe informimit të qytetarëve për këto çështje. Kjo tregon për një mungesë të theksuar të komunikimit institucional dhe nevojën për fushata më të forta ndërgjegjësuese, në mënyrë që qytetarët të përfitojnë nga mundësitë që ofrojnë këto programe për të kursyer energji dhe për të përmirësuar cilësinë e jetesës. /Skyweb.al
