Në Tiranë ishte këtë të mërkurë kryetari i bashkisë së New York Eric Adams, i cili u prit në Kryeministri nga kreu i qeverisë Edi Rama.
Takimi u përqendrua në forcimin e lidhjeve mes Shqipërisë dhe qytetit amerikan. Në fokus ishte nxitja e vendosjes së një linje direkte fluturimi mes Tiranës dhe Nju-Jorkut, çështje që aktualisht po diskutohet me autoritetet amerikane të aviacionit.
“Folëm për nxitjen që ju doni të bëni për të përshpejtuar atë që ne po e diskutojmë aktualisht me Aviacionin Federal të SHBA-së për një linjë e drejtpërdrejt nga Nju-Jorku që do të ishte e jashtëzakonshme, pasi do të sillte përfitimet të mira për kompanitë duke qenë se shqiptarët udhëtojnë shumë dhe janë shumë të prirur që të vijnë më tepër nga SHBA nëse ka një fluturim direkt”, tha Rama.
Kryebashkiaku Adams shprehu interes për të forcuar lidhjet ekonomike dhe tregtare mes dy vendeve dhe theksoi rëndësinë e krijimit të një marrëdhënieje të qëndrueshme dhe afatgjatë në disa fusha, përfshirë biznesin, kulturën dhe turizmin.
“Erdha këtu të flas për turizmin si të ndihmojmë dhe të shfrytëzojmë jo vetëm muajt që më kanë mbetur në detyrë, por edhe muajt më pas, për të siguruar një linjë fluturimi drejtpërdrejt me New York City sepse ndihmojnë drejtpërdrejt banorët atje, por edhe këtu në vend”, tha Adams. /Skyweb.al
