Pas incidentit të rëndë të së dielës, ku dhjetëra pasagjerë shqiptarë mbetën në tokë në aeroportin e Dortmundit, kompania Wizz Air e ka përsëritur të njëjtën praktikë vetëm dy ditë më vonë.
Skyweb.al mësoi nga udhëtarë që fluturuan të martën pasdite nga Dortmundi në Tiranë se tetë pasagjerë të tjerë janë lënë sërish në aeroport, pasi kompania kishte kryer overbooking.
Sipas dëshmive, mes tyre ishin një çift italianësh, dy çifte gjermanësh që kishin prenotuar për në Theth dhe dy udhëtarë të tjerë, të cilët nuk u lejuan të hipnin në avionin e radhës drejt Tiranës.
Ndërkohë, pasagjerë që u kthyen të dielën në Tiranë i thanë Skyweb se Wizz Air i ka mashtruar me premtime të rreme për dëmshpërblim.
“Na gënjyen që të mos bënim zhurmë aty para gjermanëve. Na thanë do merrni 250 euro kredi në llogarinë tuaj në Wizz Air, pastaj disave na dhanë vetëm 100 euro, dhe as ato nuk e dimë kur do t’i marrim”, tha një pasagjer për Skyweb.al.
Incidenti i së dielës
Të dielën, fluturimi W4 5126 Dortmund–Tiranë, i planifikuar në orën 15:45, u vonua pasi stafi gjerman i aeroportit zbuloi se kompania kishte shitur më shumë bileta se kapaciteti i avionit.
Në vend që të sigurojë alternativa të menjëhershme, Wizz Air u ka ofruar udhëtarëve të mbetur në aeroport të fluturojnë vetëm të martën ose të mërkurën, duke u justifikuar se atëherë do të kishte vende të lira.
Kjo është herë pas here një praktikë e përsëritur nga kompania, e cila shitet më shumë bileta se numri i vendeve në avion, me arsyetimin se një pjesë e pasagjerëve nuk paraqiten në fluturim.
Por në rastet kur të gjithë mbërrijnë në aeroport, shumë prej tyre mbeten jashtë avionit.
Sipas burimeve nga sektori i aviacionit, Wizz Air po përballet gjithashtu me probleme teknike, pasi 38 avionë të saj janë aktualisht jashtë funksioni për shkak të defekteve në motorë, çka ka shkaktuar vonesa dhe anulime të shumta në linjat evropiane. /skyweb.al
