Korporata e Investimeve Shqiptare ka anuluar për të katërtën herë thirrjen për projektin “LIFT Tower”, pas mungesës totale të aplikantëve në afatin zyrtar të dorëzimit të dokumenteve.
Në njoftimin zyrtar të Korporatës thuhet se “nuk u paraqit asnjë aplikant në datën dhe orën e caktuar”, duke e bërë të pamundur vijimin e procedurës për përzgjedhjen e partnerit privat që do të ndërmerrte ndërtimin e godinës së re të Kadastrës Shqiptare.
Projekti është pjesë e programit qeveritar për zhvillimin e pronave publike përmes partneriteteve me sektorin privat, ku shteti ofron truallin dhe përfiton një pjesë të hapësirës në ndërtesat që ndërtohen në këmbim të investimit.
Konkretisht, “LIFT Tower” parashikon ndërtimin e një kulle 40-katëshe mbi tokë dhe 7 kate nëntokë, në zonën pranë rrugës “Muhamet Gjollesha” në Tiranë. Investitori privat do të kishte detyrimin të financonte ndërtimin e godinës së re të Kadastrës, ndërsa shteti do të përfitonte rreth 45 për qind të sipërfaqes së përgjithshme të ndërtimit.
Përpjekjet për ta realizuar këtë projekt kanë dështuar disa herë. Në shpalljen e parë në nëntor 2024, dy kompani – “EDIL AL IT” dhe “DK Construction ONE Corp” – u kualifikuan për fazën e dytë, por asnjëra nuk dorëzoi ofertë përfundimtare. Edhe shpallja e dytë u mbyll pa sukses, pasi aplikimi i “Alko Impex” dhe “EDIL AL IT” u shpall i pavlefshëm për shkak të pasaktësive në dokumentacion. Në tentativën e tretë, me afat deri më 30 maj 2025, asnjë ofertë e vlefshme nuk u paraqit.
Sipas Korporatës, që synon të nxisë zhvillimin e pronave publike përmes investimeve private, projekti mbetet i rëndësishëm për modernizimin e infrastrukturës administrative dhe për energjizimin urban të Tiranës. Megjithatë, mungesa e interesit nga ana e sektorit privat tregon vështirësitë e tregut për të përballuar projekte të tilla voluminoze, me kosto që llogariten në qindra milionë euro.
Pas katër tentativave të dështuara, mbetet e hapur pyetja nëse “LIFT Tower” do të arrijë ndonjëherë të marrë jetë, apo nëse epoka e kullave, që ka dominuar zhvillimin urban të Tiranës në vitet e fundit, po i afrohet fundit. /skyweb.al
