Ndërsa të ardhurat nga turizmi po shënojnë rritje të ndjeshme, buxheti i shtetit grek po përfiton gjithashtu nga tarifat dhe taksat e reja të vendosura mbi aktivitetet turistike.
Përveç të ardhurave tradicionale nga bizneset dhe TVSH-ja, qeveria greke ka futur masa si tarifa për qëndrueshmërinë klimatike dhe taksa për pasagjerët e anijeve turistike, të cilat po rezultojnë burime të rëndësishme të ardhurash.
Sipas të dhënave nga Ministria e Transportit Detar dhe Politikave për Ishujt, nga 21 korriku deri më 21 tetor, kur nisi zbatimi i taksës për anijet turistike, janë mbledhur 31 milionë euro.
Deri në fund të vitit, kjo shumë pritet të kalojë 40 milionë euro.
Edhe tarifa e qëndrueshmërisë klimatike, e cila paguhet për çdo natë qëndrimi në strukturat turistike, ka sjellë rreth 300 milionë euro gjatë tetë muajve të parë të vitit, ndërsa vetëm në korrik u arkëtuan 86.94 milionë euro.
Të dyja masat përfshijnë klauzola që parashikojnë kthimin e një pjese të të ardhurave në komunitetet lokale përmes investimeve në infrastrukturë dhe zhvillim lokal, por shpërndarja e fondeve prej rreth 370 milionë eurosh të mbledhura për vitin 2024 mbetet ende e paqartë.
Tarifa klimatike u rrit në fillim të vitit 2025 sipas një vendimi qeveritar, ndërsa taksa për pasagjerët e anijeve u zbatua për herë të parë në mes të korrikut. Në total, pritet që të ardhurat nga këto dy masa të afrohen me 1 miliard euro gjatë periudhës 2024–2025.
Sipas Bankës së Greqisë, të ardhurat nga turizmi gjatë tetë muajve të parë të vitit 2025 arritën në 16.7 miliardë euro, duke u rritur me 1.7 miliardë euro ose 12% krahasuar me një vit më parë. Fitimet nga turistët gjermanë u rritën me 6.6% duke arritur në 2.637 miliardë euro, nga Franca me 5.5%, ndërsa nga Mbretëria e Bashkuar u shënua një rritje prej 8.7%. Tregu amerikan regjistroi rritjen më të lartë, me 20.6%, duke reflektuar forcimin e pozicionit të Greqisë si një nga destinacionet më të qëndrueshme turistike në Evropë.
