Në dosjen hetimore që po hetohet nga SPAK janë përfshirë edhe komunikime mes zëvendëskryeministres Belinda Balluku dhe ish-drejtorit të Autoritetit Rrugor Shqiptar, Evis Berberi, pak ditë para emërimit të tij në krye të institucionit.
Nga përmbajtja e bisedës rezulton se Balluku e kishte paralajmëruar Berberin se nga performanca e tij në këtë detyrë do të varej edhe e ardhmja e saj politike.
Në datën 28 maj 2021, në orën 15:03, Balluku i dërgon mesazhin:
“I dashur Visi, marrëdhënia jonë ka kaluar ups and downs shumë herë, por e rëndësishme është që unë ty të konsideroj një nga personat më të afërt. Ndryshe nga herët e tjera, këtë herë po të jap diçka nga e cila varet e ardhmja ime, e jotja dhe e shumë të tjerëve që ndodhen përqark nesh. Në rast se do të dështojë në këtë detyrë të re, të siguroj që do ishte një goditje e madhe për mua… Dua ta marrësh shumë seriozisht… Hermetizëm, asnjë takim, asnjë premtim, të jesh prezent në çdo kantier, të mos marrësh vendime pa konsultim. Mos më zhgënje! Ta gëzosh, sapo e more emërimin.”
Në të njëjtën orë, Berberi i përgjigjet:
“Faleminderit. Më ke vlerësuar gjithmonë më shumë sesa kam pasur mundësi ta kthej. Nuk do të zhgënjej, përkundrazi.”
Vetëm tre ditë pas këtij komunikimi, më 31 maj 2021, Evis Berberi u emërua zyrtarisht në detyrën e Drejtorit të Përgjithshëm të Autoritetit Rrugor Shqiptar. /skyweb.al
