Përdorimi afatgjatë i suplementeve me melatonin, per gjumin mund të lidhet me një rrezik më të lartë të komplikacioneve të zemrës, sipas një studimi të ri. Megjithatë, ekspertët paralajmërojnë se ende nuk ka arsye për panik, pasi hulumtimi nuk provon një lidhje shkak-pasojë.
Studimi, i bazuar në të dhënat mjekësore të mijëra të rriturve me pagjumësi kronike, tregoi se ata që morën melatonine për një vit ose më gjatë kishin rreth 90% më shumë gjasa të zhvillonin komplikacione te zemrës brenda pesë viteve të ardhshme, krahasuar me ata që nuk e përdorën. Përdoruesit e melatoninës kishin gjithashtu trefish më shumë gjasa të shtroheshin në spital për probleme kardiake dhe dyfish më shumë gjasa të vdisnin nga çdo shkak, shkruan CNN duke iu referuar studimit.
Megjithatë, autorët theksojnë se studimi ka kufizime dhe nuk është ende i rishikuar nga kolegët apo botuar në ndonjë revistë shkencore. Ai do të prezantohet në konferencën vjetore të Shoqatës Amerikane të Zemrës më 7–10 nëntor 2025.
Melatonina është një hormon natyral që prodhohet në tru për të ndihmuar trupin të përgatitet për gjumë. Versionet suplementare, të cilat mund të jenë me origjinë shtazore ose sintetike, janë shumë të përhapura si ndihmë për pagjumësinë. Por në SHBA, melatonina shitet si suplement ushqimor dhe nuk i nënshtrohet kontrolleve të rrepta të FDA-së, çka mund të çojë në doza të pasakta ose përbërës të padeklaruar.
Pagjumësia kronike prek rreth 10% të popullsisë botërore dhe ndikon në kujtesë, energji, përqendrim dhe mirëqenie të përgjithshme. Ndërsa kërkohen më shumë studime për të kuptuar ndikimin e melatoninës në zemër, mjekët rekomandojnë që përdoruesit të konsultohen me specialistët përpara se ta përdorin për periudha të gjata. /Skyweb.al
