Qeveria shqiptare ka mbyllur praktikisht çdo garë për furnizimin me armë, municione e pajisje ushtarake, duke i dhënë biznesmenit Emiljano Dusha me kompaninë MSSC përmes shoqërisë shtetërore “KAYO” monopolin e furnizimit të ushtrisë, policisë dhe strukturave të tjera të sigurisë, raporton Skyweb.al.
Vendimi, i miratuar sot nga Këshilli i Ministrave, përcakton se të gjitha institucionet e sigurisë janë të detyruara të blejnë pajisjet dhe armatimet vetëm përmes “KAYO”-s, ose përmes kompanive të krijuara apo të lidhura me të.
Në vendim thuhet se “KAYO”, sh.a., është e autorizuar vetë apo përmes kompanive të lidhura, të prodhojë dhe tregtojë armë, municione, pajisje, teknologji dhe veshje ushtarake, për përdorim nga strukturat e sigurisë dhe organet në varësi të tyre.
Sipas vendimit, çdo kërkesë për furnizim me produkte apo shërbime nga këto institucione duhet të paraqitet vetëm pranë “KAYO”-s, e cila do të vendosë nëse do ta realizojë vetë furnizimin ose përmes një prej kompanive të saj të lidhura.
Nëse “KAYO” nuk përgjigjet brenda 30 ditësh, institucioni mund të kalojë në procedura të tjera prokurimi, por në praktikë, kjo e bën atë deri në 100% portën e vetme të furnizimit për shtetin shqiptar në sektorin e armëve.
Kujtojmë se “KAYO” është një kompani shtetërore me 100% kapital publik, e krijuar në vitin 2024 për prodhimin dhe tregtimin e pajisjeve ushtarake.
Por në fund të gushtit të këtij viti, ajo u bë bashkëaksionere me biznesmenin Emiljano Dusha, përmes dy kompanive të reja të përbashkëta:
-
“Guna Tactical”, ku KAYO zotëron 51% dhe Dusha 49%.
-
“M.K.D”, ku Dusha zotëron 80% dhe shteti shqiptar vetëm 20%.
Në këtë mënyrë, Dusha, i njohur për lidhjet e ngushta me pushtetin dhe përfitues i disa tenderëve sekretë në fushën e mbrojtjes, futet zyrtarisht në monopolin shtetëror të tregtimit të armëve dhe municioneve.
Tre vite më parë, biznesmeni përfitoi një kontratë rreth 30 milionë euro, përmes një tenderi sekret për furnizimin e ushtrisë me armë, çka e bëri një nga emrat më të fuqishëm të industrisë së mbrojtjes në vend.
Vendimi i sotëm i qeverisë jo vetëm e forcon pozitën e tij në treg, por praktikisht i jep Emiljano Dushes kontroll të plotë mbi furnizimet e të gjitha strukturave të sigurisë shqiptare, përmes kompanive ku ai dhe shteti janë ortakë. Në këto kushte, Dusha nuk është më një biznesmen privat, por një kontraktor privat që operon në emër të shtetit.
Pozitë më të volitshme për të bërë para as që do ta kishte imagjinuar kur blinte vota për maxhorancën, sipas opozitës në zgjedhjet e 2021.
Ky model eliminon konkurrencën dhe rrit rrezikun e abuzimeve, pasi çdo blerje e ardhshme e policisë apo ushtrisë do të bëhet përmes një kanali të vetëm, “KAYO”-s dhe kompanive të saj të lidhura me Dushen. /skyweb.al
