E njihni ndjesinë? Përkuleni për të lidhur lidhëset e këpucëve dhe papritur ndjeni një dhimbje therëse në pjesën e poshtme të shpinës. Dhe kështu, bëheni pjesë e një statistike tronditëse, i bashkoheni rreth 619 milionë njerëzve në mbarë botën që vuajnë nga dhimbja e shpinës së poshtme. Fatmirësisht, ekziston një ushtrim i dobishëm që mund të ndihmojë, quhet “salsa e ulur”.
Dhimbja e shpinës së poshtme është shkaku kryesor i paaftësisë në mbarë botën. Ajo përkufizohet si dhimbje midis pjesës së poshtme të brinjëve dhe vitheve. Mund të prekë këdo, por është më e zakonshme tek personat mbipeshë, duhanpirësit dhe ata me histori familjare të kësaj gjendjeje.
Sipas Chris McCarthy, profesor i asociuar i fizioterapisë në Universitetin Metropolitan të Mançesterit, pjesa ku njerëzit kanë më shumë probleme në shpinë janë dy disqet e fundit të shtyllës kurrizore.
Shtylla kurrizore përbëhet nga 33 rruaza, secila e ndarë me një shtresë kërcore të butë të quajtur disk, i cili vepron si amortizator gjatë ecjes, vrapimit apo kërcimit. Dy rruazat e fundit, ku zakonisht ndodh dhimbja, janë të lidhura me legenin përmes ligamenteve shumë të forta. Kjo i ndihmon ato të mbajnë peshën e trupit, por ka edhe një anë negative.
“Kjo pjesë e shpinës është shumë e ngurtë dhe është e vështirë ta lëvizësh, sidomos kur muskujt janë në spazmë ose të tendosur nga mungesa e lëvizjes,” – shpjegon McCarthy.
Një mënyrë e mirë për të ushtruar muskujt e kësaj zone është rrotullimi i legenit nga njëra anë në tjetrën, duke bërë që pjesa e poshtme e shpinës të lëvizi në një lëvizje “përkundjeje”. Kjo ndodh natyrshëm kur ecim, por kur ndjejmë dhimbje, muskujt kontraktohen dhe bllokojnë zonën, duke e bërë më të ngurtë dhe më të dhimbshme.
Lëvizja është thelbësore për shërimin, tregojnë studimet. Megjithatë, shumica e ushtrimeve për shpinën nuk aktivizojnë mjaftueshëm pjesën e poshtme të saj.
Si ta bëni “salsa-n e ulur”:
Uluni drejt, me këmbët të mbështetura mirë në tokë.
Mbani këmbët afër njëra-tjetrës, në mënyrë që kofshët të jenë paralele.
Pa lëvizur supet, shtyni gjurin e djathtë përpara dhe të majtin prapa.
Pastaj ndërrojeni, shtyni të majtin përpara dhe të djathtin prapa.
Pelvisi duhet të rrotullohet lehtë, sikur po kërceheni salsa.
Përsëriteni këtë lëvizje për rreth një minutë.
“Pelvisi bën një lëvizje të vogël përkundjeje, ashtu si duhet të bëjë kur ecni,” shpjegon McCarthy.
Në një studim pilot të zhvilluar nga ekipi i tij në Manchester Movement Unit, pacientët me dhimbje të shpinës që kryen këtë ushtrim për një minutë çdo 30 minuta, treguan për çlirimin e muskujve dhe ulje të simptomave të dhimbjes, sipas matjeve me sensorë elektromiografie (EMG).
“Bukuria e këtij ushtrimi është se mund ta bëni edhe kur jeni në punë, pa u ngritur nga tavolina,” shton McCarthy.
Ky ushtrim është i dobishëm edhe për të moshuarit që e kanë të vështirë të ngrihen e ulen shpesh.
Edhe pse ecja dhe qëndrimi në këmbë janë mënyra shumë të mira për të parandaluar dhimbjen e shpinës, salsa e ulur mund të jetë një zgjidhje praktike për ata që kalojnë shumë kohë ulur, si punonjësit e zyrave. /Skyweb.al
