Në gjithë vitet e saj si gazetare, autorja nuk e kishte imagjinuar kurrë se do t’i duhej të pyeste dikë se si ndjehet ndërsa i injektojnë spermë trofte në fytyrë. Megjithatë, ja ku ndodhet, në një klinikë të vogël estetike në jug të Mançesterit, ku Abby 29 vjeçe po merr një trajtim me polinukleotide.
Edhe pse quhen zakonisht “spermë salmoni” ose “spermë trofte”, në të vërtetë injektohen fragmente shumë të vogla të ADN-së së nxjerra nga qelizat e këtyre peshqve. ADN-ja e njeriut është mjaft e ngjashme me atë të peshqve, dhe ideja është që këto fragmente të nxisin qelizat e lëkurës të prodhojnë më shumë kolagjen dhe elastinë, dy proteina që e mbajnë lëkurën të fortë dhe elastike. Abby shpreson të freskojë pamjen, të përmirësojë shëndetin e lëkurës dhe të trajtojë aknet, sidomos shenjat dhe skuqjen.
Polinukleotidet po bëhen trend i madh në industrinë estetike, sidomos pasi disa të famshëm, si Charli XCX, Kim dhe Khloe Kardashian, madje edhe Jennifer Aniston, kanë folur hapur për to, duke i përshkruar si një lloj “vitamine të thellë” për lëkurën. Disa në industri i quajnë madje një hap drejt “rigjenerimit të vërtetë”, edhe pse krahasimi me filmin “Benjamin Button” mbetet më shumë një hyperbolë.
Studimet e deritanishme tregojnë se këto injeksione mund të përmirësojnë shëndetin e lëkurës, të zvogëlojnë vijat e imta, rrudhat dhe shenjat. Por trajtimi kushton shumë: një seancë shkon nga 200 deri në 500 paund, dhe zakonisht rekomandohen tre seanca fillestare, me rifreskime çdo gjashtë deri në nëntë muaj.
Nurse Helena Dunk, që e drejton klinikën Skin HD, thotë se popullariteti është rritur shumë gjatë 18 muajve të fundit. Sipas saj, gjysma e klienteve shohin ndryshim të madh në lëkurë më shumë hidratim, shkëlqim dhe ndjesi rinore, ndërsa te gjysma tjetër efektet janë më të buta, por gjithsesi pozitive.
Abby, që e ka bërë edhe trajtimin poshtë syve, e përshkruan procedurën si mjaft të dhimbshme, por me rezultat të dukshëm në zvogëlimin e rrathëve të errët.
Megjithatë, jo të gjithë kanë përvoja pozitive. Dermatologë si Dr John Pagliaro paralajmërojnë se të dhënat shkencore ende nuk janë të mjaftueshme. Ai thotë se ne e dimë rëndësinë e nucleotideve për trupin, por s’është e qartë nëse “injektimi i ADN-së së salmonit të prerë në copa të vogla” funksionon aq mirë sa pretendohet. Ai do të donte studime shumëvjeçare, të mëdha dhe të besueshme, para se ta përdorte këtë trajtim në praktikën e tij.
Nga ana tjetër, jo të gjithë klientët dalin të kënaqur. Charlotte Bickley, 31 vjeçe nga Nju Jorku, e quajti përvojën e saj “salmon-gate”. Ajo mori trajtimin para martesës, por përfundoi me infeksion, inflamacion dhe rrathë edhe më të errët. Dyshon se injeksioni u bë shumë thellë nën sy, duke shkaktuar reagim negativ. Edhe pse efektet anësore zakonisht janë të përkohshme – si skuqje, ënjtje dhe mavijosje – mund të ketë edhe rreziqe më serioze, si reaksione alergjike, pigmentim apo infeksione.
Në Mbretërinë e Bashkuar, polinukleotidet janë të përhapura dhe regjistrohen si pajisje mjekësore nga MHRA, por nuk rregullohen si barna. Në SHBA, nuk janë të miratuara nga FDA.
Charlotte thotë se do të donte të mos e kishte bërë kurrë trajtimin. Edhe pas 10 muajsh dhe mijëra dollarëve të shpenzuara për të rregulluar dëmet, ajo ende ka shenja nën sy – dhe nuk do ta përsëriste kurrë.
