Në Komisionin Parlamentar për Çështjet e Brendshme, Haki Çako paralajmëroi për një situatë të rënduar në jug të vendit si pasojë e përmbytjeve të ditëve të fundit.
Ai deklaroi se Shqipëria ndodhet praktikisht në një gjendje emergjence, ndonëse kjo nuk është shpallur ende zyrtarisht. Sipas Çakos, edhe pse reshjet e ardhshme nuk pritet të jenë në nivelet ekstreme të ditëve të kaluara, ato do të jenë të mjaftueshme për të mbajtur të lartë rrezikun e përmbytjeve.
Tre bashkitë më të prekura janë Saranda, Delvina dhe Finiqi. Dëmet e shkaktuara janë të konsiderueshme, veçanërisht në sektorin e blegtorisë, bletarisë dhe fermave të shpendëve, ndërsa problemet janë shtrirë edhe në infrastrukturë.
Për të përballuar situatën, janë ngritur komisione të posaçme që po vlerësojnë dëmet në terren me qëllim përgatitjen e kompensimeve për qytetarët e prekur. /Skyweb.al
