Qeveria ka miratuar shpërblimin e fundvitit për pensionistët, duke vendosur dy nivele bonusi 15 mijë lekë dhe 10 mijë lekë, në varësi të kategorisë së përfituesve dhe masës së pensionit.
Vendimi prek praktikisht të gjithë grupet e mbrojtjes sociale, nga pensionet bazë e deri te trajtimet e veçanta financiare.
Sipas vendimit, shpërblimin prej 15 mijë lekësh do ta marrin:
• Pensionistët me pension pleqërie deri në 20 000 lekë, përfshirë edhe këtë nivel.
• Të gjithë përfituesit e pensioneve të invaliditetit, pensioneve familjare dhe pensionit social.
• Fëmijët që trajtohen financiarisht nga shteti si “fëmijë në përkujdesje të Republikës”.
• Personat që marrin vetëm trajtim të veçantë financiar sipas ligjeve të sigurimeve shoqërore, pa qenë pensionistë.
• Familjarët e pilotëve që kanë humbur jetën gjatë detyrës, që përfitojnë trajtim të veçantë financiar.
• Veteranët e LANÇ-it dhe përfituesit e pensioneve të posaçme për merita të veçanta.
• Personat me pension të parakohshëm për vjetërsi shërbimi deri në 20 000 lekë, që aktualisht nuk janë të punësuar.
• Punonjësit e minierave, industrisë së naftës, gazit dhe metalurgjisë, të cilët përfitojnë trajtim financiar deri në 20 000 lekë sipas skemave të veçanta.
• Punonjësit e ish-ndërmarrjeve ushtarake, që marrin trajtim të veçantë financiar deri në 20 000 lekë.
Në total, ky grup përfiton shpërblimin më të lartë, i cili synon të mbështesë kategoritë me pensionet më të ulëta dhe trajtimet sociale më të ndjeshme.
Ndërsa shpërblimin prej 10 mijë lekësh do ta marrin:
• Pensionistët me pension pleqërie mbi 20 000 lekë.
• Personat që përfitojnë trajtime të veçanta financiare mbi 20 000 lekë nga skemat e minierave, ish-ndërmarrjeve ushtarake dhe sektorëve të tjerë të rëndë.
• Ish-ushtarakët, policët, punonjësit e SHISH-it, Gardës, burgjeve, zjarrfikësve dhe kontrollit të brendshëm, që marrin pension të parakohshëm me masë mbi 20 000 lekë.
• Personat që marrin vetëm pension shtetëror të posaçëm, pa qenë pjesë e skemës së zakonshme të sigurimeve shoqërore.
• Ish-funksionarët që marrin pensione suplementare sipas ligjit të vitit 1996.
• Punonjësit e profesioneve të vështira (miniera, naftë, gaz, metalurgji) me përfitime mbi 20 000 lekë.
Të gjitha kategoritë përfitojnë shpërblimin vetëm një herë, edhe nëse marrin më shumë se një lloj trajtimi financiar.
Shuma totale e paketës financiare është 10.4 miliardë lekë, prej të cilave 10.3 miliardë lekë për shpërblimet dhe 72.3 milionë lekë për kostot administrative. Pagesat do të kryhen në dhjetor 2025, ndërsa çdo pagesë e mbetur pezull duhet të jepet deri më 30 qershor 2026.
