Prodhimi vendas i energjisë elektrike shënoi rënie të fortë gjatë tremujorit korrik – shtator 2025, si pasojë e kushteve të dobëta hidrike.
Sipas INSTAT, prodhimi neto arriti në 1.075 gWh, nga 1.565 gWh një vit më parë, duke regjistruar një rënie me 31.3%.
Pesha e hidrocentraleve publike ra ndjeshëm, por ato vijojnë të mbeten burimi kryesor i energjisë me 54.5 për qind të totalit.
Hidrocentralet private dhe koncensionare siguruan 16.5 për qind, ndërsa centralet fotovoltaike zënë tashmë 29 për qind të prodhimit, duke shënuar rritje të ndjeshme për shkak të mungesës së burimeve ujore.
Rënia e prodhimit ka detyruar vendin të rrisë importet.
Të dhënat e INSTAT tregojnë se importi i energjisë u rrit me 65.3 për qind në këtë tremujor.
Megjithatë, eksportet rezultuan gjithashtu në rritje me 10.8 për qind.
Humbjet në rrjet, përfshirë transmetimin dhe shpërndarjen, ranë në 323 gWh nga 344 gWh një vit më parë, një ulje prej 5.9 për qind.
Konsumi i energjisë elektrike mbeti pothuajse i pandryshuar.
Në total, përdorimi i energjisë ra me vetëm 0.1 për qind.
Bizneset ulën konsumin me 0.3 për qind, ndërsa konsumatorët familjarë shënuan rritje minimale prej 0.1 për qind. /skyweb.al
