Një nga grabitjet më të pazakonta të këtij viti është regjistruar në Francë, ku persona të paidentifikuar kanë vjedhur rreth 450 kilogramë kërmij nga një fermë në verilindje të vendit. Sipas mediave franceze, dëmet kapin shifrën mbi 100,000 dollarë, duke e lënë pronarin në një situatë të vështirë vetëm pak javë para rritjes së kërkesës për festat.
Fermë familjare L’Escargot Des Grands Crus njoftoi në Facebook se kishte rënë viktimë e një vjedhjeje, në të cilën autorët morën pothuajse të gjithë stokun e kërmijve të freskët dhe të ngrirë. Kompania, që prodhon rreth 350,000 kërmij në vit, shprehet se mbeti e tronditur nga ky incident që rrezikon seriozisht kapacitetin e saj të prodhimit përpara Krishtlindjeve dhe Vitit të Ri.
Sipas France Info, hajdutët depërtuan me forcë gjatë orëve të para të mëngjesit së hënës. Ata shkuan drejtpërdrejt në zonat e magazinimit dhe boshatisën thuajse tërësisht dhomat e ftohta. Pronari, Jean-Mathieu Dauvergne, tregon se autorët gjetën rafte të mbushura me kërmij të konservuar, të freskët dhe të ngrirë.
Një pjesë e stokut të marrë nuk ishte ende e përpunuar, pasi guaskat nuk ishin pastruar dhe gjalpi shoqërues nuk ishte përgatitur. Sipas pronarit, produkti në atë gjendje nuk mund të konsumohej menjëherë.
Dëmi për biznesin është i konsiderueshëm, pasi rreth 60% e të ardhurave vjetore vijnë nga sezoni festiv. Megjithatë, falë solidaritetit të fermerëve të tjerë të kërmijve, pronari ka arritur të furnizojë disa restorante, përfshirë edhe ata me yje Michelin, pasi kolegët e tij i kanë ofruar një pjesë të stokut me çmime të ulëta.
Alexandre Maire, një tjetër fermer, deklaroi për France Info se sektori është mobilizuar për ta ndihmuar kolegun e tyre të përballojë këtë situatë të pazakontë dhe të mos humbasë sezonin festiv. /Skyweb.al
