Netflix do të blejë studiot televizive, filmike dhe njësinë e transmetimit të Warner Bros Discovery për 72 miliardë dollar. Kjo marrëveshje i jep gjigantit të transmetimit kontrollin mbi një prej aseteve më të vjetra dhe më të njohura të industrisë së filmit në SHBA.
Ky zhvillim shënon një kthesë të madhe për Netflix, kompania që vite më parë revolucionarizoi mënyrën se si konsumohen filmat dhe serialet, dhe që me këtë marrje nën kontroll po shndërrohet gjithnjë e më shumë në një studio tradicionale.
Marrëveshja u arrit pas disa javësh gare ofertash. Netflix ofroi rreth 28 dollarë për aksion, duke kapërcyer ofertën e Paramount Skydance, i cili shihej si pretendenti kryesor për blerjen e Warner Bros Discovery dhe divizioneve të saj televizive.
Netflix, i njohur për prodhime origjinale si “Stranger Things”, “Bridgerton” dhe filma si “KPop Demon Hunters”, fiton me këtë lëvizje një arkiv historik të pasur me një shekull prodhimesh të Warner Bros.
Në portofol përfshihen seri ikonike si “Game of Thrones”, “Harry Potter”, dhe universi i superheronjve të DC Comics, përfshirë Batman dhe Superman.
Megjithatë, marrëveshja pritet të përballet me shqyrtim të rreptë rregullator në SHBA dhe Evropë. Netflix, platforma më e madhe e transmetimit në botë, po blen një konkurrent që zotëron HBO Max dhe afro 130 milionë abonentë.
Analistët paralajmërojnë rezistencë nga sindikatat dhe një pjesë e Hollivudit, për shkak të ndikimit që mund të ketë kjo përqendrim në treg. /skyweb.al
