Marina suedeze raporton se pothuajse çdo javë përballet me nëndetëse ruse në Detin Baltik, ndërsa Stokholmi parashikon se prania ushtarake e Moskës në rajon do të rritet pasi të vendoset një armëpushim në Ukrainë. Lajmi u konfirmua nga shefi i operacioneve të marinës, kapiten Marko Petkovic, i cili theksoi se Rusia po zgjeron dhe modernizon vazhdimisht flotën e saj detare.
Sipas tij, identifikimi i mjeteve detare ruse është bërë pjesë e përditshmërisë për marinën suedeze. “Kjo ndodh shumë shpesh. Numri i rasteve është rritur vit pas viti,” tha Petkovic. Ai shtoi se situata në Baltik po bëhet gjithnjë e më e ndërlikuar, për shkak të sulmeve të dyshuara hibride me dronë, rrezikut të sabotimit të infrastrukturës nënujore dhe qarkullimit të anijeve të vjetra të transportit të naftës nga “flota hije” ruse. Edhe Mbretëria e Bashkuar javët e fundit ngriti alarmin, pasi një anije ruse spiune hyri në ujërat e saj dhe përdori rreze lazer kundër pilotëve ushtarakë, një veprim që Londra e përshkroi si shenjë të “një epoke të re kërcënimesh”.
Petkovic shpjegoi se relievi i ndërlikuar nënujore në Baltik u jep avantazh nëndetëseve, të cilat mund të fshihen lehtësisht. Ai vuri në dukje se Rusia prodhon çdo vit një nëndetëse të klasës “Kilo” në Shën Petersburg dhe Kaliningrad, pjesë e një programi modernizimi të flotës.
Sipas tij, nëse arrihet armëpushim në Ukrainë, Rusia pritet të rrisë praninë e saj detare në Baltik. Për këtë arsye, ai theksoi se Suedia duhet të vazhdojë forcimin e kapaciteteve të marinës.
Petkovic ngriti gjithashtu shqetësime për flotën civile ruse të cisternave që transportojnë naftë në mënyrë të kamufluar. Ai tha se “flota hije” nuk përbën kërcënim të drejtpërdrejtë ushtarak, por mund të shfrytëzohet për aktivitete që kërcënojnë sigurinë e rajonit, duke përfshirë nisjen e dronëve.
Ai theksoi se infrastruktura nënujore në Baltik mbetet e cenueshme për shkak të kushteve specifike të ujit, gjë që ndikon veçanërisht Suedinë, Norvegjinë, Finlandën, Estoninë dhe Lituaninë — vende të varura nga linjat detare për komunikim dhe furnizim.
Megjithatë, Petkovic vlerësoi se rritja e vigjilencës së NATO-s ka sjellë rezultate pozitive. “Që nga fillimi i operacionit ‘Baltic Sentry’ në janar, nuk kemi pasur asnjë incident me kabllot nënujore,” tha ai, duke theksuar se prania e aleancës ka rritur ndjeshëm ndërgjegjësimin dhe kujdesin e flotës tregtare në rajon.
