Policia Rrugore ka zhvilluar kontrolle të shtuara gjatë 48 orëve të fundit, duke konstatuar një numër të lartë shkeljesh që ndikojnë drejtpërdrejt në sigurinë rrugore dhe në krijimin e kaosit në trafik.
Sipas të dhënave zyrtare, janë vendosur 524 masa administrative, ndërsa 12 drejtues mjetesh janë arrestuar ose proceduar penalisht për manovra të rrezikshme që rrezikonin jetën e përdoruesve të tjerë të rrugës.
Një nga problematikat më të theksuara ka qenë mosrespektimi i radhës në trafik, me 85 drejtues mjetesh që krijuan situata të çrregullta në qarkullim, duke penguar lëvizjen normale dhe duke rritur rrezikun e aksidenteve.
Në total, Policia Rrugore njofton se ka vendosur:
– 85 gjoba për mosrespektim të radhës dhe manovra të rrezikshme;
– 179 gjoba për mosvendosje të rripit të sigurimit;
– 260 gjoba për përdorim të celularit gjatë drejtimit të mjetit.
Në deklaratën zyrtare, Rrugorja apelon që drejtuesit e mjeteve të tregojnë kujdes maksimal dhe të zbatojnë rregullat bazë të qarkullimit, duke theksuar se përdorimi i celularit dhe mosvendosja e rripit vijojnë të jenë ndër shkeljet më të përhapura që rrisin rrezikun e aksidenteve.
“Respektimi i rregullave, përdorimi i rripit të sigurimit dhe shmangia e celularit gjatë drejtimit janë detyrime jetike për të mbrojtur veten dhe të tjerët. Kontrollet vijojnë çdo ditë, në të gjitha akset e qarkut”, njofton Policia Rrugore.
Aksionet për rritjen e sigurisë rrugore do të vazhdojnë me intensitet, me fokus tek sjelljet që gjenerojnë rrezik dhe shkaktojnë kaos në trafik. /skyweb.al
