SPAK i është drejtuar Kuvendit duke kërkuar heqjen e imunitetit dhe autorizimin për arrestimin e zëvendëskryeministres Belinda Balluku, në kuadër të hetimeve për një sërë procedurash të mëdha prokurimi të Ministrisë së Infrastrukturës.
Sipas SPAK, Balluku është marrë zyrtarisht e pandehur për veprën penale “Shkelja e barazisë së pjesëmarrësve në tendera apo ankande publike”, në bashkëpunim, lidhur me ndërtimin e tunelit të Llogarasë. Ajo është gjithashtu nën hetim për shtatë tendera të tjerë të mëdhenj të akseve rrugore, si:
• Sheshi Shqiponja–Lumi i Tiranës, Loti 1 dhe QMT
• Segmenti Sheshi Shqiponja–Bulevardi i Ri, Loti 2
• Sheshi Shqiponja–Bulevardi i Ri–Shkozë, urat mbi lumin Tiranë
• Unaza e Jashtme Tiranë, Lotet 4, 5, 6 dhe 7
Kërkesa e SPAK synon t’i hapë rrugë masave të mëtejshme të sigurimit, përfshirë arrestin e mundshëm të zëvendëskryeministres.
Reagimi i kryeministrit Edi Rama
Kryeministri reagoi menjëherë në rrjetet sociale, duke e lidhur kërkesën e SPAK me vendimin e fundit të Gjykatës Kushtetuese për pezullimin e Ballukut nga detyra.
Rama shkruan se:
“Pasi u rrëzua nga Gjykata Kushtetuese për pezullimin antikushtetues dhe antidemokratik të një anëtari të qeverisë, pa u tharë ende boja e vendimit të Kushtetueses, prokurori i kërkon Kuvendit autorizimin për të arrestuar zv.kryeministren, me burg ose në shtëpi.
Që arrestet pa gjyq janë bërë një modë e vrazhdë në Shqipëri dhe që vendi ka më shumë të paraburgosur se sa të burgosur, një fakt i turpshëm që ka shqetësuar edhe Këshillin e Europës, kjo dihet.
Ne s’mund dhe s’duam ta paragjykojmë kërkesën e prokurorit special, por na kërkohet të japim opinion dhe ne do të angazhohemi me përgjegjësi përpara shqiptarëve që na dhanë 83 mandate.
Do të mbajmë një qëndrim të drejtë, të qartë dhe të denjë, si forca udhëheqëse e vendit dhe e Reformës në Drejtësi.” /skyweb.al
